電競音樂節又玩又睇 工銀亞洲攤位排長龍

由旅發局主辦，工銀亞洲贊助，一連3日嘅「工銀亞洲香港電競音樂節」噚晚終圓滿結束，Team Kinguin同MIBR兩支隊伍，仲入咗《CS︰GO》全球總決賽，認真犀利！黛安噚日都有入場觀賞，地點由紅館轉咗嚟會展，現場氣氛不減，而且地方大咗之餘，體驗區又有冷氣，大家都玩得開心又舒服，難怪兩位好姊妹旅發局仙姐（Cynthia）同工銀亞洲嘅Angela，連開三日工都咁神采飛揚啦！

喺體驗專區芸芸參展攤位中，最勁嘅攤位，非工銀亞洲莫屬，事關佢長期排晒長龍，個個都等住率先體驗《極限對決》、《城市守護者》同《生化煉獄》三款新世代4D VR遊戲，兼拎走同分數等值嘅信用卡免找數簽帳額！搞到黛安都忍唔住即場恭喜Angela，佢話多謝大家支持就真！而其他攤位亦各出奇謀，搵咗好多靚仔靚女齊齊示範，相當吸睛。

黛安唔打機，但亦乘機了解下電競產業點解愈來愈受歡迎的理由，順便欣賞一班專業電競選手比賽時嘅英姿，先發現電競果然唔止打機咁簡單，好似睇緊世界杯一樣，緊張又刺激，氣氛一流！黛安仲知道，今次比賽總獎金超過300萬港元，電競選手果然有前途亦有「錢途」，慢慢成為一個勁受歡迎嘅產業，希望旅發局下年繼續舉辦「電競音樂節」，畀更多人有機會體驗！