銀河Oasis 歎頂級榴槤放題

以往從來都唔食榴槤嘅黛安，上個星期應銀河娛樂集團好姐妹Vicky同Evelyn邀請，去澳門銀河酒店獻出咗第一次，出席第7屆馬來西亞美食節嘅開幕禮，仲第一次食榴槤！

黛安好多年都無去澳門，趁今次可以周圍行下，仲順道學下嘢。當晚就遇到《晴報》專欄作家鄧達智（William）同佢partner陳醫生（Clement），佢哋結緣，都係因為榴槤。

黛安原本對榴槤味好抗拒，但今次放題喺銀河嘅「綠洲」Oasis宴會廳舉行，室外位置空氣流動，反而令榴槤味唔會困住。現場有10款馬來西亞頂級榴槤，包括D24蘇丹王、D163葫蘆、D197貓山王等等。黛安第一口就試咗貓山王，亦都係最鍾意嘅，口感軟綿棉，好似雪糕咁，雪凍咗仲易入口，吃落口反而無濃郁嘅榴槤味，就好似咖啡一樣，食同聞係唔同感覺嘅。現場仲有創新手法炮製嘅榴槤菜式，包括榴槤芝士焗龍蝦、榴槤鮑魚椰汁雞湯、黃金榴槤薄餅，真係大開眼界。

想食榴槤，Oasis每日有兩個自助餐時段，不過聽Vicky講，自助餐未開幕已經訂滿，想食真係一票難求啊！但話到明係馬來西亞美食節，現場仲有其他馳名馬來美食，包括炒粿條、沙爹、喇沙等等，真係聽到都流口水！