助夾心基層病友 李嘉誠基金會捐$1億

長和系資深顧問李嘉誠退而不休，李嘉誠基金會噚日宣布，同醫管局、港大及中大合作捐出1億元推《愛能助》醫療支援試驗計劃，最快明年初啟動，希望幫助一班有經濟壓力嘅病友。

目前政府有向弱勢社群提供資助，但對未能獲得政府資助嘅「夾心基層」家庭，龐大嘅醫療開支會成為家庭重擔。李嘉誠希望，透過《愛能助》計劃，幫助有經濟壓力嘅病人同親屬。

黛安知道，計劃會向需進行正電子電腦斷層掃描（PET-CT）嘅癌症或其他類別患者，資助5,000元，預計一年可幫2,000人，資助額共1,000萬元；同時會資助冠狀動脈介入治療術（PCI）患者5,000元，預計一年幫到4,000人，資助額2,000萬元。只要受惠對象不是綜援人士、無受惠關愛基金、獲撒瑪利亞基金資助，毋須經濟審查就可參與，發放方法要再同醫管局商討。

基金會又向醫管局建議，捐3,500萬元畀新界西醫院聯網設立早期診斷癌症「正電子電腦斷層掃描（PET-CT）中心」，新界區嘅病人之後就唔使再長途跋涉跨區睇病，預計最快2020年中啟用。

基金會亦會支持港大李嘉誠醫學院同中大醫學院研究工作，資助達3,500萬元。