林國誠新書 活用玄學提升正能量

香港電訊無綫業務市場營銷總裁林國誠（Bruce）喺電訊業縱橫超過20年，黛安仲知道，佢係已故玄空正傳宗師嘅關門弟子，今年書展就出新書《五里山─活用玄學的人生》，同大家分享通過玄學同宗教，對人生嘅改變同提升正能量。

Bruce行銷方面有幾勁，一向人所共知，更被譽為「營銷鬼才」。雖然公務繁忙，但無阻佢鑽研玄學風水嘅決心，仲一直有寫專欄同大家分享。Bruce就話，經過大半年嘅籌備，集結咗百幾篇自己最鍾意同最有收藏價值嘅文章，重新編排整理，分做堪輿風水、密宗、提升正能量嘅方法、凶宅研究等題目。新書裏面，最吸引嘅莫過於係凶宅研究，包括石棺藏屍案、淘大工業村風水結構等。Bruce話，佢為求用鐵錚錚嘅例子引證唔同嘅學理，特別喺最接近案發日子去現場，仲影相做記錄，新書更係首次將有關相片曝光！等黛安都要去買番本，學下嘢先得！