AXA安盛600員工 連做2300小時義工

黛安一向認為，無論做人或者做生意，除咗要取之有道，仲要對社會有貢獻。公餘做下義工，就係唔錯嘅選擇。早排黛安同AXA安盛好姊妹講起，先知道原來佢公司好鼓勵員工服務社會，仲喺剛過去嘅6月19日至23日，一連5日「馬拉松式」動用超過600個同事，做咗26個義工活動，服務時數長達2,300小時，總共有8個非牟利團體、逾1,200人受惠，AXA安盛行政總裁白禮恒等高層都有親身帶領員工幫手，真係行善不甘後人。

原來AXA安盛年年都會搞企業責任周，今年就用健康人生做主題，義工服務都圍繞住健康飲食、體魄同精神健康範疇。好似幫香港基督教女青年會嘅服務中心，喺港九新界替逾100個長者做體適能測試，幫長者保持住心肺功能、肌力同柔軟度，keep住過至fit人生；佢地仲緊貼世界杯熱潮，幫YMCA健步足球訓練班學員做熱身運動同訓練球技。

義工仲去惜食堂幫手處理食物，整咗超過1,900個飯盒，成為惜食堂創辦以來整得最多飯盒嘅義工隊，令受助嘅老人家同小朋友都食得好開心；義工仲教基層婦女用「超級食物」藜麥同蔬菜整飯卷。