雲集6大星級食府 「旺角煮場」開幕

旺角一向都多嘢食，黛安知道，旺角最近有新食點叫「旺角煮場」，噚日正式開幕喇。黛安有幸出席咗開幕禮，原來集齊咗6間星級食府，包括兩間首次進軍香港嘅北海道拉麵店「味の時計台」同泰式餐廳「Khaosoi House」，加埋來自美國嘅「Popeyes」，真係堪稱場內嘅海外食肆「鐵三角」！

另3間「本地薑」亦唔輸蝕，包括由星級名廚Mr. Harlan Goldstein主理嘅星級品牌「Cornerstone Cafe」，名廚Harlan Goldstein嘅大名，相信大家都唔陌生，佢曾經主理過多間米芝蓮一星餐廳，今次佢主理嘅「Cornerstone Cafe」，其中一個招牌菜係中西合璧嘅叉燒肉夾包，以叉燒配上卡真醬，真係睇見都想食！

另一間就係由「阿鴻小吃」創辦人黎偉鴻創辦嘅另一品牌「鴻師傅」。「阿鴻小吃」獲米芝蓮一星榮譽，「鴻師傅」美食當然有質素保證，佢哋嘅叉燒皇煎蛋飯更曾經創下日賣300碗嘅紀錄！

有米芝蓮品牌 有80年老字號

仲有一間就係香港老字號「蓮香」。「蓮香」已經有超過80年歷史，保留住傳統茶樓嘅一盅兩件飲食文化，佢哋嘅懷舊點心好似蝦餃、馬拉糕都好出名，一定要試下！

噚日開幕禮，除咗見到幾位星級廚師，黛安仲遇到《晴報》社長麥華章，我哋一齊向幾位名廚請教心得，傾得好開心！

「旺角煮場」由SSP香港經營及管理，SSP亞太區Regional Managing Director黃曦嵐就同黛安講，希望「旺角煮場」可以俾識飲識食嘅人士帶嚟一個輕鬆、愉快嘅環境！