海洋公園親親動物月 水豚赤掌獠狨全接觸

噚日《晴報》派海洋公園歌酒節門票，黛安聽返海洋公園姊妹Una講，反應非常熱烈，電話由早響到晚，未到黃昏，就已經送晒全數門票，真係多謝讀者支持！

體驗式學習 擴闊小朋友眼界

講起海洋公園，黛安除咗玩機動遊戲，亦都好鍾意去探望各種得意可愛嘅動物，仲成日好想同佢哋近距離接觸，依家終於有機會啦！事關聽日（24日）起至5月6日就係海洋公園「親親動物月」，當中嘅「與動物親上加親」體驗活動，可以畀大家同水豚、赤掌獠狨約會，鍾意動物嘅朋友一定唔可以錯過！

水豚係來自亞馬遜河雨林嘅全球最大型囓齒目動物，聽落好似好猛，但其實個樣勁萌！至於赤掌獠狨就有亮麗嘅黑色毛髮同埋鮮明紅橙色手掌同腳掌，係黛安見過覺得外表最優雅嘅猴子！參加「約會水豚及赤掌獠狨」嘅大人同小朋友，除咗可為呢兩類動物大使準備營養小食，仲可以近距離餵飼同觀察佢哋，了解佢哋嘅日常生活習性同故事。

噚日浸信會天虹小學校長朱子穎就帶埋4歲仔仔樂樂去見水豚同赤掌獠狨，朱校長話，呢種體驗式學習令小朋友接觸新事物、擴闊眼界，更可加強小朋友嘅投入感，令學習事半功倍！

海洋公園主席孔令成話，親親動物月可啟發小朋友認識、尊重同欣賞大自然，將環保同保育概念帶到日常生活，好適合一家大細！為鼓勵香港家庭參與，即日起至5月6日，喺公園正門票務部買成人或兒童當日日間正價門票，仲會有88折優惠㗎！