導盲犬BB「六」福齊來 小學生參與命名

狗年汪汪亮相，最是喜氣應節。黛安早排同領展嘅姐妹拜年，佢仲用WhatsApp傳咗幾張好得意嘅狗仔相嚟賀歲，一問先知原來係領展「愛‧滙聚計劃」資助在港繁殖嘅導盲犬BB，依家已經差唔多2個月大了﹗不過原來6隻狗BB仲未改名，姐妹話呢班狗BB屬於「S」字輩，已經同60間小學合作，由小學生一齊諗下改一個「S」字頭嘅靚名，下個禮拜一（26日）就可以正式命名啦！

2男4女 屬拉布拉多犬

講番狗BB先，呢「2男4女」狗BB喺舊年年底出世，同媽媽Fleur一樣，都係黑色嘅拉布拉多犬。唯一分別係狗媽媽喺澳洲長大，而6隻BB都係「本地薑」，按照香港導盲犬協會過去引入嘅導盲犬抵港或出身次序去排，呢一胎已經屬於「S」世代喇。咪睇小佢哋呀，佢哋將來都要擔起重任，幫助香港嘅視障人士「邁步向前」，真係名副其實嘅「Super Dog」！

領展姐妹仲同黛安透露，初步有啲名已經擬定好啦，好似充滿陽光活力嘅「Summer」、「Sunny」，甜到漏嘅「Sugar」，自由不受束縛嘅「Star」、「Sky」，仲有向「狗壇」前輩史諾比致敬嘅「Snoopy」等等。不過到底最終改邊個名，仲要等參與計劃嘅學校分組投票後，再從中抽選6個最多人鍾意嘅名，大家拭目以待啦！