旅發局年結 「舊城中環」意念佳全球奪13獎 未來拓至深水埗

旅發局舉辦的活動，黛安參加不少，譬如美酒佳餚巡禮、龍舟嘉年華等，黛安幾乎年年都去捧場。不過，我都係最近聽旅發局仙姐（Cynthia）講先知道，原來佢哋搞的活動攞咗咁多獎！話說昨日旅發局舉行年結，提到舊年一共舉辦及推廣咗90項盛事。其中單係「舊城中環」呢個項目，就在全球囊括13個廣告及公關獎項，認真犀利！

網站瀏覽次數逾億

「舊城中環」可謂旅發局眾多活動中，黛安最深刻的一個。話說舊年佢哋為中上環設計咗5條特色旅遊路綫，黛安跟住資深導遊落區參觀之餘，仲去咗一間旗袍店租衫，着住旗袍四圍打卡，彷彿時光倒流到100至200年前的舊香港，期間更惹來不少艷羨目光。當日活動好精采，實在要讚下旅發局的同事咁有諗頭。

其實唔止舊城中環，舊年旅發局眾多活動一共在國際舞台奪得69個大獎。數碼媒體方面都錄得好成績，過去一年旅發局的網站有超過1.2億次瀏覽，多個社交媒體平台，包括fb、Twitter、微信等就吸納超過890萬名粉絲，比上一年增長3成，真係要為仙姐及一班同事鼓掌。

由於舊城中環反應好好，仙姐透露今年五月將會將理念推廣至深水埗。點解會揀呢區？因為深水埗昔日係製衣中心，未來會透過衣、食、住、行四方面，向遊客介紹這個特色老區：譬如走入「鈕扣街」、「珠仔街」尋找DIY材料及價廉物美的服飾，品嘗米之蓮一星級點心「添好運」及地道豬膶麵；又可透過參觀美荷樓，認識香港的房屋歷史。席間大家七嘴八舌，深水埗原來係一個文武雙全嘅地方，既是昔日國學大師錢穆從內地南下的落腳地，亦出過一代詠春宗師葉問，蘊藏不少歷史和名人故事。期待五月底跟旅發局去深水埗打卡。