香港市務學會35周年 6位marketers獲頒學士

「市務學」聽落雖然好似好抽象，但其實我哋日常生活中無時無刻都接觸到呢樣嘢架。今年係香港市務學會成立35周年，上星期四（14日）黛安就有幸出席學會35周年晚宴暨年度學士頒授典禮。學會榮譽主席陳裕光博士當晚仲同立法會批發及零售界邵家輝議員，頒授會士名銜畀6位市場翹楚︰稻香集團主席鍾偉平、時富金融執行董事及董事長關百豪、昂坪360董事總經理關敏怡、香港移動通訊市場營銷總裁暨THE CLUB行政總裁林國誠、中大市場學系副教授蘇麗文、同I Dance創辦人謝景霞，獲得全場掌聲！

綠色營銷係未來新趨勢，當晚學會邀請咗Green Monday創辦人楊大偉（David）分享佢嘅可持續發展營商理念同環保營銷策略。David不單止打造出素食嘅藍海業務，仲將環保運動融入日常生活，真係獲益良多！學會當晚特登準備「無綠不歡」晚宴，菜式包括奇亞籽肉碎炒飯、金香醬脆魚件等，食好嘢之餘，仲減少肉食對環境造成嘅污染。