夠號召力 唐唐1個月籌$1億 買同鄉會新址

前政務司司長唐英年係江蘇人，兩年前發起成立香港江蘇社團總會並出任會長，有總會就梗係要有會址啦，佢哋搵咗幾個月終於搵到啦，新會址仲係一炮過斥資$1億買，江蘇同鄉嘅財力同實力真係唔講得笑！

新會址位於灣仔越秀大廈，身為會長嘅唐唐噚日就帶黛安同一班傳媒參觀。唐唐話本來睇啱上環一處地方，點知對方後來反口加價逾10％，佢條氣唔順惟有再搵，最後就搵到而家呢個面積約7,000呎嘅單位。

辦公室掛張曉明書法

唐唐話個單位係買嘅，大家即刻問幾多錢啦？唐唐就話$1億，仲即場「解構」呢筆錢點得來，「我哋發起籌資，本來係籌$1億，點知個幾月已籌到$1億5千萬。我打去問（籌資），有人問番我，『$1億咁少？我畀夠$2億都得！』真係好大口氣，好慷慨，好多謝一班熱心的朋友。」唐唐話自己同其餘6位首席永遠創會會長，每人奉獻咗$800萬。

新會址當中亦有唐唐嘅個人辦公室，最吸晴就係一幅寫有「蘇港同輝」嘅題字，原來係出自中聯辦主任張曉明手筆，真係份量十足呢！