李慧詩醒你3招 操練腿部肌肉

5年前，「牛下女車神」李慧詩（Sarah）喺倫敦奧運為香港贏得奧運銅牌，全城歡呼。但原來佢自細就有貧血，體力亦唔係好好，如果唔係憑住堅強意志同埋永不放棄嘅精神，都好難完成咁艱巨嘅任務。噚日馬會宣布推出「千里路踏前步」社區勵志計劃，邀請唔同年齡人士參加，希望大家好似Sarah咁，克服重重挑戰，突破自己。

呢個計劃首階段，就以運動和健康生活做主題，叫做「21日挑戰」，仲邀請咗3位體壇明星參與，包括李慧詩、「神奇小子」曹星如和冠軍騎師莫雷拉，話要鼓勵大家「操fit對腳」、「食得有營」和「家中健身」。大家即日起至12月底網上登記參加後，每人每次揀一個項目去挑戰，例如閱讀圖文、收看教學短片、上載相片等，連續21日完成21項分別需時15分鐘嘅任務就得㗎啦（詳見：http://21day.hkjc.com/）！就連馬會CEO應家柏都舉手參加！Sarah話一直都想宣揚運動嘅好處，希望透過活動讓大家踏出第一步，建立運動習慣。佢仲即席示範3招簡單體操，教大家點樣鍛練腿部肌肉𠻹！

未定會否出戰奧運

另外，大家都好關心Sarah會唔會參加2020年東京奧運，佢就話仲未決定，要再同教練和家人商量，依家先要應戰下月底係天津舉行既全運會爭先賽和凱琳賽。其實距離東京奧運仲有時間，大家為佢嚟緊幾場比賽加油先啦！