港龍養生煲仔飯 冬季最啱食

昨日11度低溫下，黛安吃了今個冬天第一餐煲仔飯，用料大都是養生菇菌，有黑松露、雞油菌、牛肝菌等，食完「暖笠笠」，難以想像如此好吃的煲仔飯竟是飛機餐。

機上銷售雙位數增長

黛安不但試吃了港龍頭等艙的時令煲仔飯，並率先睇到下季機上銷售目錄，仲即時睇中一件Chanel古董首飾。聽港龍機艙銷售服務部經理陳婉儀（Irene）講，首飾購自一位紐約收藏家，其實港龍今季已賣緊其百件收藏，八成沽清，今次再接再厲，此後更會物色名錶收藏家，提供更多獨家貨。

Irene又話，今年在機艙遇見最豪客人，一口氣花了三萬元買名牌化粧品及電子產品；亦有山東客在機上一連買下15部麵包機。此外《衝上雲霄II》Sam哥用開的德國名牌篋RIMOWA，則創下一個月賣出逾百個的紀錄。旅客花得起，難怪今年港龍機上銷售有雙位數增長。

席間黛安並遇港龍CEO楊偉添（Patrick）。他日前去了北京參加國際航空運輸協會北美區副總裁張保健的60大壽生日會，回港不久昨又到港龍大廈招呼賓客，真勤力。

Patrick又帶黛安參觀了港龍的新頭等機艙，座位闊了，連娛樂節目都可自行操控。他說明年首季會在機艙提供太興靚奶茶，去外地都不怕思鄉了！