檸檬茶盒變戰車 澳門開跑

男友很喜歡檸檬茶，尤其是維他的「澀得起」配方，每朝要啜一啖先醒神。剛巧昨日維他檸檬茶（VLT）有新宣傳，黛安自然要去八卦一下。去到會場已甚驚喜，一架「烈火戰車」包裝成維他檸檬茶盒一樣，非常養眼，黛安拍了很多相給男友看。

本周五起奧海城展出

聽維他奶國際集團香港CEO齊松（Charles）講，品牌將與國際知名賽車手歐陽若曦（Darryl）及他所屬車隊Craft-Bamboo Racing合作，出戰下月中的2014澳門格蘭披治大賽車。

檸檬茶與賽車，聽落風馬牛不相及，想不到撞埋一齊咁有睇頭。Charles笑言，希望今次合作可為檸檬茶這項旗艦產品注入新元素，展現品牌活力，仲話睇好Darryl有冠軍相！而黛安所知，Darryl戰績彪炳，本月中剛於FIA世界耐力錦標賽（WEC）中，首奪第三名，話唔定可一鼓作氣再贏埋格蘭披治。

有「香港首席賽車手」之稱的Darryl話，今次用來出戰的賽車是Aston Martin V12 Vantage GT3，他自言本身幾熟悉Aston Martin，加上之前成績不錯，期望承勢再下一城。如果大家都想一睹「檸檬茶」戰車的真身，今個星期五至日可到奧海城參觀。之後Darryl就會揸走架車去澳門備戰，黛安先預祝他旗開得勝！