再睇《大隻佬》的感悟

幾個月前，朋友們談論因果話題，佢哋話必須睇電影《大隻佬》。我喺2003年，即20年前睇過。記得當時我係因為劉德華嘅大隻佬造型而入戲院睇呢套戲，至於故事情節我睇唔懂亦get唔到。聽到朋友再提《大隻佬》呢套電影原來令人有好多啟思，於是立即去搵番套戲嚟睇。果然而家多咗人生歷練後再睇番，睇完有好多情節對白不停喺腦海內盤旋。

一套好電影果然歷久不衰，唔怪之得該片榮獲第23屆香港電影金像獎13項提名，並奪得最佳電影獎、最佳編劇獎、最佳男主角獎，值得一睇再睇，相信會有唔同啟發。

好多時我哋嘅行為都係來自嗰下嘅諗法，「一念天堂，一念地獄」，可知人嘅「一念」能量可以有幾大。念由心生，要積極定係消極咁去面對人生、面對生死，就要睇自己選擇令乜嘢念頭留低，點樣去調節心中嘅「念」多啲行善。

「萬般帶不走，惟有業隨身。」呢個唔單只係佛偈，就算作為基督徒，我哋都要帶住我哋喺地上嘅所作所為，「交功課」畀耶穌。

喺戲中，深知自己離死亡不遠嘅張柏芝，與同行嘅「大隻佬」劉德華告別前問對方︰「可否借我一分鐘？」兩人手拖手，走過夜晚嘅長街時，播起呢套電影嘅主題曲《身外情》：「給一分鐘我靜靜回味，將一生一世翻天覆地，明日已被今天處死，淚存在原為反映天理……」好鍾意呢首歌喺呢段戲播放嘅timing，音樂、歌詞、畫面簡直係絕配，被感動了！其中一個感動係我嘅人生練歷真係成熟咗，至少今次睇呢套電影我比以前有所頓悟！（本欄逢周四刊登）