【譚凱琪家姐】譚凱欣做「陽光妹」曾遇尷尬事 有冇後悔婚後退出娛樂圈？

唔少藝人開設個人YouTube頻道同網民分享私下生活，教網民扮靚、減肥例如王君馨、劉佩玥等。6月底宣布懷孕嘅譚凱琪趁住喺屋企養胎嘅時間成為YouTuber，尋晚就同家姐譚凱欣罕有姊妹檔上陣，拍片講述入行經歷。

{{hket:inline-image name="13.jpg"}}{{/hket:inline-image}}

(譚凱琪instagram圖片)

{{hket:inline-image name="16.jpg"}}{{/hket:inline-image}}

(譚凱琪YouTube影片截圖)

片段一開始，譚凱琪分享姊妹嘅童年照，佢指細個有時會被人話同大家姐譚凱欣似樣，譚凱欣亦話經常被人覺得好面善，以為佢係譚凱琪：「佢哋話：『好似樣呀你兩個』，我覺得唔係咁似。」譚凱琪認為二人性格好大分別，譚凱欣比自己成熟、性感。

{{hket:inline-image name="15.jpg"}}{{/hket:inline-image}}

(譚凱琪YouTube影片截圖)

{{hket:inline-image name="12.jpg"}}{{/hket:inline-image}}

(譚凱琪YouTube影片截圖)

譚凱琪加入娛圈前，譚凱欣曾入行一段時間，喺1991年拍過風靡一時嘅檸檬茶廣告。佢憶述自己述中學嗰陣加入咗攝影學會，有次要提交人像攝影作品畀學會，佢同媽媽去赤柱影相。返屋企途中，譚凱欣突然遇上星探：「有星探拍我哋，媽咪問佢做咩事，佢話：『我覺得你個女好適合我哋嚟緊個廣告。』」當時譚凱欣只得10幾歲，讀緊書，佢抱住一試無妨嘅心態上咗製作公司試鏡，後來先知係拍陽光檸檬茶廣告。

每次陽光檸檬茶推出嘅廣告都好受觀眾歡迎，唔少人都好奇新廣告會用咩題材，譚凱欣話：「因為好少廣告由以前到依家都特登搵啲人著校服去拍，咁清純。」當時譚凱欣個廣告一播出，佢第二日返到學校就吸引咗好多老師、學生嘅注目：「之前兩個年紀比我大，我年青啲，同年紀啲學生一定會留意、會睇。真係好癲，好多人喺學校同課室門口等我，隔籬學校嘅男仔都走晒過嚟捕住我。我嗰時係排球隊，球場打波嗰陣對面學校每層都有男仔大嗌『陽光妹』，或者叫我個名，其實都好尷尬。」幸好，譚凱欣有班好朋友護送佢返屋企。

{{hket:inline-image name="14.jpg"}}{{/hket:inline-image}}

(譚凱琪YouTube影片截圖)

後來譚凱欣正式入行拍戲，曾參演電影《五個寂寞的心》、《都市情緣》等。2005年，佢同曾喺《古惑仔》飾演「蕉皮」嘅朱永棠結婚並淡出幕前，現時育有兩個囡囡，擁有幸福家庭。譚凱欣形容自己係個冇咩事業心，愛情至上嘅女人：「以前冇咩理想，每個人追求嘅嘢唔同。」佢話成日被人問有冇後悔退出娛樂圈，佢表示：「可能重新再嚟過，我唔係咁揀，但每個人都要有啲後悔先會令你識得再向前行...我依家就冇再後悔，最緊要係個過程享受。」譚凱琪都覺得家姐譚凱欣依家好幸福，仲恭喜對方識揀，將婚姻當作終身事業。

{{hket:inline-image name="17.jpg"}}{{/hket:inline-image}}

(譚凱欣微博圖片)

撰文：張芷晴
責任編輯：楊安莉