吳彥祖最近接受音樂人好友Jerald（陳哲廬）嘅網台節目《本週Jer住你》分享近況，除咗講自己點解放棄喺大陸「掘金」返美國發展嘅原因，仲大爆一次Eric Kwok（郭偉亮）同馮德倫（Stephen）喺謝霆鋒屋企炒大鑊，成件事嘅發展好似周星馳嘅電影一樣，非常爆笑呀！
Jerald（左）同吳彥祖係多年老友。（Jerald IG）
吳彥祖講番當年佢同Jerald喺謝霆鋒屋企初次見面，當時Eric同馮德倫為討論啤牌嘅規矩而嗌交：「以為係講笑嘅，但發展到一個地步係冇人覺得舒服。」Jerald仲記得佢哋嘈交嘅原因只係為咗拗「蛇食三條」定「三條食蛇」，Jerald之後仲聽到有人被摑一巴，嘈到不可收拾嘅地步。
Eric同Jerald當年組成二人男子組合「Swing」。（網上圖片）
吳彥祖同馮德倫一出道已經合作拍戲。（《美少年之戀》劇照）
吳彥祖當時都好似只係講笑：「好似係Eric不斷喺度講笑講笑，然後Stephen突然爆，我識佢咁多年冇見佢係咁，所以我都好愕然，我以為係假嘅添，我以為係玩吓，但我見到佢手震先知係真。」之後主人家霆鋒出嚟「和事佬」，阻止二人繼續嘈落去，Jerald仲模仿霆鋒：「你係我兄弟，你又係我兄弟，唔好X嘈喇，得唔得呀！」成件事都好有霆鋒Style同好有畫面。
特警新人類組合可以話係超經典！左起：馮德倫、謝霆鋒、吳彥祖以及李璨琛（馮德倫Facebook）
謝霆鋒（左）與馮德倫（馮德倫Facebook）
不過吳彥祖憶述喺咁混亂嘅時刻，張栢芝竟然喺側邊打木人樁，好似活喺第二個世界咁：「你記唔記得霆鋒有啲詠春嘅嘢喺側邊，我記得佢哋嗌緊交嘅時候，Ceci（張栢芝）就喺度練緊詠春，我當時真係覺得好奇怪，唔知發生緊咩事，個個人都鬧緊交，但栢芝喺度打緊詠春個木人樁，我同你好似係唯一正常嘅人。」 會唔會其實嗰刻吳彥祖同Jerald其實去咗平行時空呢？真係一諗到個場面就覺得非常搞笑呀！
當年鋒芝結婚，由Eric Kwok（中）為二人擔任證婚人。（網上圖片）
撰文：黃蘊姿