在日前首播的TVB新劇《迷網》中，可見到不少嶄新面孔，如當中有飾演楊明弟弟的樓嘉豪。有些觀眾或會對他有些印象，其實他在之前《十八年後的終極告白》中飾演何遠東的年輕版，而這一套也是他首部在TVB有角色發揮的作品。今日樓嘉豪（Lawrence）接受《晴報》專訪，分享他的入行經歷及感受，以及他對演戲的熱誠，「我希望將人哋嘅一生表露無遺咁呈現出嚟，讓觀眾自己去思考，對於作為演員嘅我嚟講就係最大嘅滿足感。」
樓嘉豪尋晚劇中已經出場。(圖片：《迷網》劇照)
(圖片：樓嘉豪IG)
剛踏入26歲的Lawrence，小時候就已經喜歡演戲，到了大學時期，更選擇入讀香港演藝學院追夢，在2017年戲劇藝術學士畢業後便投考TVB藝訓班。Lawrence說：「細個跟媽媽生活，不過佢經常唔喺屋企，主要由婆婆照顧我，大約七至八歲，婆婆因為身體差就返咗內地養病。嗰陣時我經常自己玩，自己一個喺屋企嗰陣，就得返有線電視陪住我。咁嗰陣成日播周星馳啲戲，次次睇完我都覺得好開心，我就發現原來做戲係唔需要再忍受自己一個人寂寞，係可以咁大班人陪伴住自己，所以一直都想試吓做戲，無奈一直冇機會接觸，直至到上大學。」
(圖片：受訪者提供)
Lawrence又提到，自己小時候因身形問題，曾被屋企人勸他不要發明星夢。「以前由細到大我都係肥仔，麥當勞要食兩個餐嗰種，仲記得中一我皮帶要放到最後一格，所以外表上都唔討好，屋企人都曾經叫我唔好發明星夢，後來機緣巧合喺中學接觸到跳舞，從中搵返自信，並且愈跳愈瘦，連HKAPA面試才藝表演我都係選擇跳舞，評判講過話我做戲其實好屎，但身體控制節奏感同跳舞好好，最後有幸入到。」
(圖片：受訪者提供)
(圖片：樓嘉豪IG)
在Lawrence畢業後，他報考TVB藝訓班，希望繼續追演員夢。剛巧當時《十八年後的終極告白》監製王偉仁，正在當時最新一期藝訓班中物色劇集人選，結果當時飾演「大東邨七子」的年輕版都是同一屆的畢業生，而Lawrence就是其中一分子，飾演何遠東的年輕版「肥仔富」。「可能係睇到我某部份嘅特質同我師兄何遠東相似，就安排咗謝家富呢個角色畀我。及後有幸得到監製王偉仁畀咗我一個咁寶貴嘅機會，演繹《迷網》司徒正呢個角色，願意冒咁大個險將一個咁重發揮嘅角色交托畀一個新人，實屬難得，所以我十分感謝他的支持和信任。」
(圖片：樓嘉豪IG)
(圖片：《十八年後的終極告白》電視截圖)
相關新聞：【十八年後的終極告白】大東邨七子新晉演員逐個捉 有個係BBC劇做主角 有個係驗樓師
提到今次新劇《迷網》，Lawrence飾演司徒正，外表斯斯文文，原來是一個無目標的fresh grad。「佢係一個大學準畢業生，冇志向冇目標，一味淨係識向哥哥(楊明飾)、爸爸(姜大衛飾)、媽媽(馬海倫飾)攤大手板，無所事事嘅青年。平時鍾意同朋友出街，面對自己心儀嘅人阮燕菁(朱斐斐飾)表現靦腆，又遲遲唔敢表態，之後得到好朋友何世軒(容天佑飾)嘅鼓勵和推動之下，終於夠膽示愛。」Lawrence形容，阿正是一個一旦喜歡上就會為對方付出全部嘅暖男。
(圖片：《迷網》劇照)
(圖片：《迷網》電視截圖)
(圖片：《迷網》電視截圖)
(圖片：《迷網》電視截圖)
Lawrence又直言作為新人的他在拍劇時相當緊張，很怕出錯。「加上第一次同咁多前輩對戲，我簡直係緊張到成個人標晒冷汗，想像吓錄影廠已經好大冷氣，但係我仍然滴緊汗水，手掌心濕晒，幕後同事都連忙遞紙巾比我。」他亦很感謝導演Calvin的安慰，曾對他說：「錯唔緊要，係過程嚟㗎，要相信你嘅對手，佢哋都係一班好好嘅前輩演員。」至於他在劇中的一家人對他亦非常友善：「仲有John哥畀好多角色演繹上嘅建議我參考和面對鏡頭的拍攝知識，Helen媽又會成日煮好多嘢食返嚟請大家食，大佬楊明幾乎日日萬歲請大家飲嘢，成個劇組氣氛好融洽，好開心同充滿正能量。」
(圖片：樓嘉豪IG)
之後在王偉仁監製的《一笑渡凡間》裏面，亦可以看到Lawrence的演出。問到將來他會想挑戰甚麼角色？他就表示每個角色都想嘗試：「每個角色我都想嘗試，對於我嚟講，每個劇本的每個角色都代表著人哋嘅一生，我希望將人哋嘅一生表露無遺咁呈現出嚟，讓觀眾自己去思考，咀嚼品嚐，對於作為演員嘅我嚟講就係最大嘅滿足感。」Lawrence對演戲十分有熱誠，為角色亦落足心機準備，令人期待他在今次劇集中的表現。
佢喺《一笑渡凡間》裏面飾演王國立，係一名捕快。(圖片：樓嘉豪IG)
佢話第一次拍古裝劇充滿新鮮感和好奇心，對佢而言都相當具挑戰性！(圖片：樓嘉豪IG)
(圖片：樓嘉豪IG)
相關新聞：【迷網】72歲馬海倫老戲骨三線劇集都有份 演姜大衞惡死老婆同楊玉梅鬥嘴
撰文：林惠珊