汪明荃扮Sammi爆汗拍片 「玩命」羅家英嘲肉酸

汪明荃（阿姐）雖然已72歲，但相當緊貼網絡潮流，不但自創「汪阿Tag」，成功引來眾星模仿，早前她又潮跟鄭秀文（Sammi）拍攝爆汗運動片放上網。不過阿姐老公羅家英竟然「玩命式」嘲笑片段肉酸，完全不怕激嬲阿姐。

汪明荃昨日擔任商台雷霆881節目《一家大晒》嘉賓，分享與老公羅家英抗疫期間的日常趣事。日前阿姐素顏運動後，扮鄭秀文2.0爆汗自拍放上網，網民反應十分熱烈，她笑說：「嗰日我練跳舞練到喘晒氣，靈機一觸諗起Sammi，就拍咗條片放上網。家英哥返到屋企，我同佢講條片好大回響，佢仲笑我話條片好『肉酸』。」至於家英哥早前由吉隆坡回港後便要隔離，亦暫停所有工作，阿姐笑說：「隔離期間，我有好好招呼佢㗎！」阿姐透露二人平日一起操粵曲，所以即使常常待在一起，也不會覺得悶。

商討振興粵劇界

另外，身為八和會館主席的阿姐，坦言粵劇界大受疫情影響：「每年三月本應係粵劇最旺嘅時候，有好多神功戲，但係依家全數取消晒，粵劇界真係好慘。」阿姐表示粵劇界準備於本月底與民政事務局局長開會，大家商討對策，希望能幫助業界。

撰文︰Pauline

編輯：李潔盈

美術：梁政敏