前無綫新聞主播余浩宗2016年喺報道新聞時眼紅紅，引起網民熱烈討論。當時已經辭職嘅佢有指係因為髮型問題被高層「照肺」而感不快，不過當日余浩宗喺facebook解畫，指眼紅只係因為工作進入倒數階段而「感觸及感動」。
（網上圖片）
余浩宗（Cyrus）喺電視螢幕上消失多年，不過仍不時於社交網分享近況。
（網上圖片）
澳洲新聞系畢業返港嘅佢由於廣東話發音唔夠字正腔圓，第一次面試主播失敗，不過經過練習後，終於講到一口「正音」廣東話，踏上佢嘅主播之路。Cyrus深明「羅馬非一日建成」呢個道理，健身方面佢同樣落咗唔少苦功，Cyrus循序漸進咁由昔日嘅白淨男搖身一變成為爆肌男，一身「朱古力」腹肌同起晒𦟌嘅手瓜。
（余浩宗IG）
Cyrus指自己以前身體好差，冇運動之餘人瘦肚腩大，身邊玩開健身嘅朋友提點佢健康好重要，於是跟佢哋做起Gym來。依家嘅Cyrus留埋鬚佬味十足Man到爆，同之前嘅「文弱書生」簡直係判若兩人。
（余浩宗IG）
Cyrus提到以前喺主播崗位令到自己好多嘢都唔敢喺公眾場合做，只係同朋友飲兩杯都會驚畀人影，反而依家開心啲，冇咁多掣肘。不過佢指以前做無綫主播都開心，只係臨尾有啲小插曲，佢亦唔排除會上返主播枱，覺得將來嘅嘢冇人知。
（余浩宗IG）
今日，Cyrus喺自己嘅社交網表示佢會開設Youtube Channel，徵詢網民意見，睇大家想睇咩類型Video。同Cyrus「Bff」嘅陳嘉倩離開無綫之後發展都一樣唔錯，已經有一定Fans數量嘅Cyrus睇嚟打算依樣畫葫蘆發展KOL事業。
（余浩宗IG）
唔知依家咁Fit嘅佢會唔會拍片教大家健身Tips呢？
（余浩宗IG）
撰文:黃蘊姿