尋日天文台一早已經發出酷熱天氣警告，唔少人都留喺室內避暑，但汪明荃（阿姐）尋日就頂住大熱天氣出動到海灘清理垃圾，同行還有緋聞情侶郭子豪及鄧卓殷。
阿姐近月經常出心出力，多次購入口罩及消毒用品，幫助有需要人士解困，尋日佢就率兩位後輩去到清水灣二灘做義工。
阿姐又分享片段，指短短時間內3人行咗一小段路就執咗6袋垃圾，當中包括玩具飛機、口罩、膠樽等。
佢哋仲執到一大箱被棄置嘅外賣，真係講得出嘅垃圾都有，非常冇公德心呀！當中最「恐怖」嘅垃圾莫過於入面「有餡」嘅BB紙尿片，臭到阿姐都彈開咗少少，話「感覺好恐怖」。阿姐呼籲大家唔好自私，「自己垃圾自己帶走」。
身為娛圈中最具影響力之一嘅阿姐，一出Post已經引嚟唔少藝人「跟隊」,包括胡杏兒同江嘉敏等，大讚佢哋呢個活動好有意義，仲話下次都要跟埋阿姐一齊去做義工！而市民都好驚嘆72歲嘅阿姐咁有魄力，仲要戴住護膝同一班後生落手落腳執垃圾，係娛圈中最正氣嘅藝人呀！
今次活動嘅另一個焦點就係郭子豪同鄧卓殷，郭子豪去年5月被爆疑背拍拖3年嘅圈外女友Karen同鄧卓殷密會，令佢一度有第三者之嫌；後來郭子豪表明已跟女友分手。郭子豪當時表示感謝鄧卓殷一直喺身邊扶持，但就避談係咪發展地下情。
不過之後他們仍繼續合作做節目，依家又「拍拖」同阿姐做義工，似乎感情相當穩定，戀情開始浮面。阿姐分享嘅照片中，兩人更不避嫌大方合照，不過佢兩個嘅個人社交網就冇Post呢張３人合照。
圖片來源：Instagram
撰文：黃蘊姿