陳凱琳（Grace）於2018年與鄭嘉穎拉埋天窗，並於2019年2月誕下兒子鄭承悅（Rafael）。唔經唔覺已經歲幾嘅Rafael精靈可愛，盡得爸爸媽媽真傳，唔少人都催佢哋快啲「啤」多個基因咁好嘅BB，今日終於有消息指Grace再佗B！
Grace曾大方表示與鄭嘉穎早有計畫追多個，加上個人生意，明言要一年幾兩年先有機會重回幕前工作，但依家再度懷孕，相信重回幕前嘅計畫又要擱置喇。
（陳凱琳IG）
其實Grace對上一次公開露面已是四月，當時佢宣布同YouTuber好友合資創立化妝棉品牌，當日佢嘅衣着都比較鬆身。雖然手腳都仲係好瘦，不過根據上次Grace佗Rafael嘅情況，得天獨厚嘅佢都係「肥肚唔肥人」。
（陳凱琳IG）
翻查Grace嘅社交平台，近月上傳嘅相大部分都係上半身同「回帶」Post舊照，不過一睇片就即刻見到佢身形的確係唔同咗！Grace拍咗一條化妝棉嘅宣傳片，由遠處走向鏡頭嘅Grace身穿鬆身睡衣，但就明顯見到佢胸脹咗同埋腰圓圓，似足孕媽媽嘅身形。
（陳凱琳IG）
（陳凱琳IG）
而另外一條片就見到佢着鬆身恤衫，腰前仲刻意綁咗個大結，似乎係想遮肚。
（陳凱琳IG）
（東星娛樂）
眼見新冠肺炎再度有確診紀錄，錫老婆錫到燶嘅嘉穎就唔使Grace出街周圍走，獨力帶阿仔出去放電。早前佢就帶住一歲幾嘅Rafael到維園大草地「放電」，但就未見到Grace嘅身影。
（陳凱琳IG）
（陳凱琳IG）
而喺上周嘅母親節，Grace亦有隨父子二人到維園享受家庭樂，並喺社交網站分享Rafael嘅可愛相片，寫下長文畀寶貝仔，表示令佢再度想起佗B時嘅經歷同過程，相信再度做媽媽亦係佢有感而發嘅原因之一。本報就向Grace查證呢個喜訊孰真孰假，惟直到截稿前仍未有回覆。
詩詠（右下）差啲爆響口？（林子善IG）
今日唐詩詠和林子善昨日出席新劇《超能使者（暫名)》記者會，詩詠被問到「阿哥」鄭嘉穎是否快將再做爸爸？詩詠聞言後表現十分驚訝，並反問：「講咗啦？」但當記者追問佢係咪知道內情時，佢就回答：「真係唔知道，我覺得唔會囉，最近見到Grace都仲係好瘦，冇可能嘅。（上次幾時見到Grace？ ）佢間店舖開張嗰日見到佢，當日佢仲着住高踭鞋，所以我覺得唔會有咗，不過我都想佢快啲有嘅， （知唔知佢哋係咪想追個女？ ）咁佢哋不嬲都鍾意女，尤其嘉穎都想追到個女，爸爸都係鍾意女嘅，咁佢哋努力下啦！」詩詠又重申嘉穎未有在群組內分享過此事，一切有待佢公布。
子善（左下）同嘉穎一家老友鬼鬼，但就話自己未收到風！（林子善IG）
而子善就話自己未收到風，大家新年後先見過面：「知佢都喺屋企『孵蛋』，而且佢好少覆電話群組，佢（湊仔）係唔會完全交托畀工人姐姐，所以依家全職湊仔，大家以前成日覺得佢經常黑臉，自從佢做咗爸爸後，已經變得很慈祥。」
撰文：黃蘊姿