2007年陳爽參加國際中華小姐競選獲得季軍，後來加入無綫，拍劇、主持工作機會不斷，備受力捧。不過佢2012年拍完重頭劇《衝上雲霄II》後，就選擇急流勇退，唔再同無綫續約，同年12月與圈外金融才俊梁梓軒結婚，分別喺2014同2017年為對方誕下一子一女，一家四口樂也融融。
（陳爽微博）
「幸福人妻」陳爽夫家三代經營參茸海味生意，自然日日進補：「每日食少少燕窩，每個禮拜食吓冬蟲草、花膠、阿 膠，有時加海參，有時鮑魚，通常老公煮，佢煮海味好叻，由細到大學咗好多知識，嗲吓佢就會整畀我食，哈哈。」陳爽亦都樂做小女人，大讚老公好有腦，無論大事小事，都相信老公做嘅決定。
（東星娛樂）
雖然已經離開咗無綫又嫁得好，但佢冇繞埋雙手做少奶奶，仲開設自己嘅網上海味店，同做海味批發嘅老爺合作，以筍價益街坊，仲以自己做生招牌，吸引咗好多信得過佢嘅客戶，建立佢嘅海味王國。
（東星娛樂）
除咗做生意，陳爽近日亦為了瘦身減肥公司拍廣告。日前，第二年擔任代言人嘅佢為廣告商影咗一輯靚相，大騷Fit爆身段。
（大會提供）
（大會提供）
為得到最佳效果，陳爽喺拍攝前一個月已經每星期一次紮肚修身，加埋郊外緩步跑和跳繩等輕量運動，短短一個月已經激減8磅，非常犀利，所以拍攝時穿上全白露腰高衩裙時亦完全見唔到有贅肉，點會睇得出佢係即將37歲嘅人母。
啱啱生完冇耐嘅佢仲未收身。（東星娛樂）
陳爽進補同Keep Fit雙管齊下，難怪2014年誕下長子梁梓熙（Adrian）後都愈來愈靚，比起當選華姐嘅「全盛時期」有過之而無不及。陳爽不時於微博、IG公開靚相靚片，大曬幸福生活，相信有老公寵愛都係佢其中一個Keep住靚靚嘅關鍵因素！
（陳爽微博）
撰文：黃蘊姿