53歲的藝人劉玉翠日前錄影《流行經典50年》，之後接受TVB娛樂新聞台訪問時透露，自己已經改名做「劉喬方」，仲話叫佢新名愈多次，對大家愈好！
（圖片：TVB娛樂新聞台影片截圖）
劉玉翠話佢改名係希望轉運，事關自己從小到大都係「藥煲」，身體一直唔好，胃痛又成日咳，去到邊都帶住藥岀門，入行30年，今次改名就係對自己嘅一份禮物。佢話：「改名對身體好，對屋企人好，對大家都好，我覺得慢慢習慣新名就好。由細到大我都係藥煲，幾歲開始食藥，中醫、西醫咩藥都食過，身體確係差。希望改咗名可以各方面都進步啦，身體、事業、周遭嘅朋友關係都會順利。」
劉玉翠宣布改名「劉喬方」（圖片：劉玉翠微博）
劉玉翠初入行第一部電影《廟街皇后》，憑飾演悲情舞女「阿Yan」一角，就勇奪香港電影金像獎最佳女配角和最佳新人獎，其後又拍過唔少電視劇，例如《他來自天堂》、《鹿鼎記》、《天龍八部》等等。
劉玉翠演《天龍八部》「阿紫」好經典（網上圖片）
入行多年，原來劉玉翠03年曾經患上情緒病。劉玉翠開始工作後，受情緒緊張影響，開始狂爆濕疹，皮膚痕到忍受唔到，睇過中醫、西醫，搽藥膏，康復又復發，病情反反覆覆，與此同時，情緒唔好到搞到佢內分泌都失調，一時間身體非常之差。佢話：「當時情緒唔好，我會將諗嘅嘢嚴重過實際發生嘅嘢，明明件事唔係咁差。情緒係一個好重要嘅器官，比肉體器官更重要，當時由皮膚問題蔓延到氣管，其實係愈嚟愈嚴重。」
（圖片：《星級會客室》影片截圖）
食咗情緒藥兩年左右，劉玉翠因為唔想依賴藥物，佢就主動同醫生講要停藥，之後開始慢慢減藥。佢話：「我真係見到好多朋友食情緒藥好多年，搞到唔敢停，亦都停唔到，我見我唔係食咗好耐，就想停下。」劉玉翠停藥後開始接觸身心靈課程，近年又用順勢療法，使用療劑，之後濕疹就慢慢冇曬，身體亦變好，真係可喜可賀！
03年開始患情緒病（圖片：《星級會客室》影片截圖）
劉玉翠努力戰勝情緒病，近年曾參加內地演講真人Show挑戰自己，又不時又同圈中好友做運動減壓，令心情舒暢。
（圖片：劉玉翠微博）
劉玉翠跟米雪一齊跑步做運動（圖片：劉玉翠微博）
撰文：羅慧怡
責任編輯：楊安莉