楊秀惠爬頭生女 陳山聰「嬲嬲豬」

陳山聰、黃智雯及譚俊彥昨日到電視城宣傳劇集《十八年後的終極告白》，提到劇中飾演啞女的楊秀惠秘密生女，山聰笑指對方無論結婚與生BB都「收得好密」，他第一時間傳短訊恭喜對方，希望BB像秀惠一樣咁靚女。

陳山聰昨日提到楊秀惠突然宣布誕女，他扮嬲說︰「豈有此理，仲爬埋我頭！我真係唔知佢結婚同生BB，之前以為佢喺馬來西亞受疫情影響，返唔到嚟宣傳。我傳短訊恭喜佢，希望BB快高長大、聰明伶俐，好似媽咪咁靚。」有指秀惠疑似奉子成婚？他說：「唔緊要啦，最緊要開心，佢真係厲害，之前佢拍咗啲手語短片宣傳套劇，我一啲都唔察覺佢陀緊B。」山聰又指太太現時陀BB情況十分穩定，暫時沒太大變化。

提到朱智賢背着緋聞男友謝東閔與人夫黎振燁車廂密會，跟謝東閔同屬「Crazy Runner」的山聰和智雯均不欲多談。山聰說︰「感情嘅嘢旁觀者不宜多講，亦無資格評論，希望當事人好好處理。」智雯則說︰「身為朋友，應該畀啲空間佢去處理，唔應該講太多。」

孟希璘「出櫃」無壓力

至於劇中飾演秀惠好友的無綫訓練班新人孟希璘（Ball），早前公開同性戀者身份，她昨日表示希望大家關注她的演出。問她宣布「出櫃」會否有壓力？Ball直言私人事跟拍劇沒有關係，公司亦沒有要求她封口，將來也不會局限自己的演出，她說︰「我咩角色都可以做，我之前喺《包青天再起風雲》演過妓女，喺《金宵大廈》都試過着短裙扮酒客。」

撰文︰倪小珊

編輯︰李潔盈

美術︰梁政敏