尋日《愛回家之開心速遞》劇情講到歐瑞偉飾演嘅舅父KC有「疑病症」，輾轉之下搵到一位叫神仙嘅「神醫」求救，仲跟埋佢去深山，希望可以醫好絕症。Peter（杜大偉）、送水輝（許家傑飾）同KC女友Icy（岑杏賢飾）驚KC畀人呃，趕到去搵「神仙」理論。
（《愛回家之開心速遞》截圖）
有眼利網民發現呢位飾演「神仙」嘅演員蔡堅成，正正係21年前喺電影《三五成群》中嘅古惑仔「神仙B」！「神仙」更喺劇中重演《三五成群》中「兇」28座大王嘅一幕。送水輝一嚟就「響朵」：「我係「好爸Bar」嘅送水輝！」
（《愛回家之開心速遞》截圖）
神仙就「兇」送水輝:「咩輝呀！依家冇人識你呀，我就叫神仙，你哋又識唔識？」如果大家有睇過《三五成群》，呢一幕必定會令你會心微笑！
（《愛回家之開心速遞》截圖）
龍虎武師出身嘅蔡堅成（B哥）曾經為四大天王、楊紫瓊、李連杰、甄子丹等做替身，不過佢真正為觀眾所認識係因為早年喺電影《三五成群》中演神仙B一角。不過B哥曾在接受訪問表示，演藝圈人情冷暖，世態炎涼，唔係成日都有戲拍，因此，六年前佢已經轉型做的士司機。不過B哥對演戲仲係好有熱誠，促成今次佢客串《愛回家之開心速遞》。
相關新聞：【廿八座大王】宋本中厭倦演古惑仔退居幕後 無數巨星提攜紅唔起個名出事
（《三五成群》截圖）
B哥表示做幕前幕後都可以，不過前提係要得到尊重。雖然唔多戲開，但B哥就曾經因為覺得不被尊重而推戲，因為對方到開拍前都未話畀B哥知佢係去做啲乜：「即使場戲係去到乜都唔使做坐喺度你都要講我知，佢都話搵我做演員啦，我又唔係去做特約，所以我最後冇去到。」
B哥喺《鎗王》中同哥哥都有唔少對手戲。（《鎗王》海報）
在影圈打滾多年，佢透露同唔少明星都有交情，連梁朝偉當年都有約出嚟打波食飯：「關禮傑都係好朋友嚟，不過張國榮我就唔敢約。」
（《三五成群》截圖）
B哥代表作「神仙B」喪摑大王宋本中嘅一幕，原來係佢自己加戲：「因為我做黑社會，我喺度兇緊佢，我一路兇一路逼前，逼到去佢前面都唔知做乜好，所以咪打佢兩巴囉。」B哥話當時大王都呆一呆，唔知點解會打佢，到cut機之後，導演都問佢點解會打宋本中。然而，出到嚟大王嘅愕然加「笠水」嘅反應，效果非常之好。
（《三五成群》截圖）
（《三五成群》截圖）
撰文: 黃蘊姿