港姐選舉可謂明星搖籃，發掘唔少娛樂圈人才，每年冠軍就得一個，但睇返咁多屆港姐，唔少佳麗同冠軍寶座或奬項失諸交臂，依然發展得好好，只要有才能，總會有發圍機會！以下呢五位港姐岀身嘅明星，更加衝岀香港，喺國際大舞台大放異彩！
相關新聞：【黃嘉雯冧莊】香港小姐選舉48年來首次因疫情停辦 精選歷年十大港姐熱話
(圖片：東星娛樂)
張曼玉
1983年香港小姐亞軍兼最上鏡小姐，當選翌年投身影圈，起初演清純少女為主，直到88年接拍王家衛執導嘅《旺角卡門》，演技大躍進，首次提名香港電影金像獎最佳女主角。張曼玉涉足影壇多年，拍過好多經典電影，拎咗五屆金像獎影后、四屆金馬獎影后，更係柏林電影節、康城影展都拎過影后，演技實力無容置疑。
(圖片：東星娛樂)
李施嬅
李施嬅03年由加拿大回港參選港姐，可惜大熱倒灶五強不入，只獲「最上鏡小姐」及「才藝小姐」獎項，不過都順利加入TVB，歷年都有唔少作品，去年嘅《金宵大廈》大受觀迎，更被封為神劇。李施嬅一心想向外闖，2017年在微電影《Once More》飾演Selina一角，奪得國際性European Cinematography Awards和Los Angeles Film Awards的最佳女演員，揚威海外，成為雙影后。去年又憑加拿大劇集《血與水》獲提名「第7屆加拿大銀幕獎」女配角，演技受肯定。
(圖片：李施嬅IG)
《金宵大廈》演「Co Co」一角爆紅(圖片：李施嬅IG)
曾愛媚
曾愛媚係2006年落選港姐，之後加入TVB發展兩年，但都係飾演閒角為主。近年佢轉戰美國，衝出亞洲，認真威水，拍過唔少美劇如《Heartbeat》、《Shameless》同《Lucifer》。《Lucifer》製作方去年宣布會開拍獨立電影《LOVE SHOT》，曾愛媚仲會擔正做女主角，真係吐氣揚眉！
(圖片：曾愛媚IG)
(圖片：曾愛媚IG)
《LOVE SHOT》網上都有得睇(圖片：曾愛媚IG)
翁杏蘭
1990年香港小姐亞軍翁杏蘭，喺TVB參演咗幾部電影同電視劇，93年就返美國繼續學業。不過佢冇放棄過演藝工作，喺美國簽約經理人公司做特約演員，間中參與拍攝，同Will Ferrell、Emma Thompson等外國演員都合作過。作品包括《Just Like A Woman》、《離奇過小說》（Stranger than Fiction）等等。
當年同屆冠軍係袁詠儀，季軍係梁小冰(圖片：梁小冰微博)
（《Chicago P.D.》劇照）
李綺虹
李綺虹1994年參加香港小姐獲季軍同最受傳媒歡迎獎，隨後加入TVB拍攝《阿Sir早晨》、《有肥人終成眷屬》等劇，佢更喺《神鵰俠侶》被封為「最美的郭襄」。2004年李綺虹同加籍老公結婚，定居加拿大溫哥華，但佢偶然都會拍攝過戲癮，好似客串《超人前傳》、《鬼靈偵探》(Psych) 等美劇 。
（《晴報》圖片）
撰文：羅慧怡
責任編輯：楊安莉