鄧麗欣（Stephy）與台灣男友邱勝翊（王子）拍拖兩年，雖然分隔兩地，但似乎都冇影響感情，非常恩愛。Stephy入行20年都唔多緋聞，除咗人人都知嘅方力申同現任王子之外，當年仲同同屆校花校草選舉中嘅其中一位校草有過一段Puppy love。
Stephy（中排右三）、Alex（上排右二）識於微時。（網上圖片）
日前討論區有網友Post Stephy參加校花選舉嘅舊照，除咗大讚Stephy當年清純之外，更將focus放喺Stephy初戀男友校草「提子」(Alex)身上。有唔少人都認出「提子」當年已經係討論區紅人，青靚白淨嘅外表再加上一個迷人小酒凹，仲有幾分似Edison添！有網民肉搜出佢嘅Instagram帳號，37歲嘅佢除咗多咗幾分男人味之外幾乎完全冇變！
（Alex IG）
見到Instagram帳號follows數量突然飆升，都發現原來自己成為咗討論區熱話，佢亦都好大方咁畀大家問問題：「雖然37歲生日又被翻舊帳，講足20年，但係歷史就係歷史，係我嘅一部分，亦係我人生比較有趣味性嘅一部分。我歡迎大家問架，你問我答，叔叔一把年紀鍾意講故，我講好過「聽人講」嘛。」
原來Alex同王子都好有淵源，係同月同日生，唔知係咪白羊座特別吸引到Stephy呢？（Alex IG）
英文名同方力申撞咗都畀人攞嚟講。（Alex IG）
Alex大讚Stephy係好人，當年因為自己去外國，戀情無疾而終，佢話Stephy紅咗之後自己都唔會主動提起佢，除非係有人問起佢佢先會講，又指自己同Stephy冇聯絡多年，最多有時會講聲生日快樂。除咗Stephy之外，有「考古」網民記得佢同施念慈發展過姊弟戀，有網民仲主動問起佢同一個大十年嘅姐姐拍拖係咩感覺，不過Alex就揞名答，隱約見到個名係「C」字開頭，同施念慈年紀同洋名「Celia」都脗合！
姊弟戀睇嚟真係好大考驗，唔知Stephy同王子又點樣衝破障礙呢？（Alex IG）
Alex從事空中服務員多年，更有「香港最靚仔空少」之稱，最近疑因政見問題而被公司「炒魷」，佢表示自己「飛夠」，唔會轉到其他航空公司，未來有多餘錢先考機師牌再圓飛天夢。另外，Alex已經成為人夫，同太太係經舊同事介紹認識：「然後相約台北淡水，然後二人開展了旅行人生，環遊世界。」
Alex老婆都好索。（Alex IG）
唔少網民都話好葡萄佢歷任女友都咁高質。（Alex IG）
但佢就話自己淨係拍過一次拖，因為之前嘅所有都係為人生嘅呢一次（意思指老婆）準備，冧到暈！（Alex IG）
同人講佢廿歲頭都有人信啦 ~（Alex IG）
撰文：黃蘊姿