藝人楊證樺喺近期熱播劇集《機場特警》飾演嘅「吹水哥」，外表花弗口花花、鍾意撩女仔同吹水，搞到辛凱晴（蔡思貝飾）拍檔勁無奈。不過原來佢深藏不露，每當緊張關頭就變得相當可靠，加上精通八國語言，令辛凱晴另眼相看。最近一集就講到楊證樺機智發現少女想企跳，並成功救咗佢，其後佢又順暢咁同外藉人士講法文，角色厲害之餘，唔少觀眾都讚楊證樺演得非常好好，話佢演技大有進步！
(TVB電視截圖)
(TVB電視截圖)
前幾日個集成功拯救企跳少女(TVB電視截圖)
喺劇中講法文毫無違和感，到底楊證樺係咪原本就識呢個語言？佢接受《晴報》電話訪問時表示：「個角色設定係鍾意吹水、去旅行同精通八國語言。我本身係唔識講呢啲外語㗎，收到劇本時都全部中文字，然後某啲句子括住要講外語咁。劇組有安排西班牙文老師畀我，日文我就搵返之前拍《義海豪情》嘅老師教我，至於法文我就請教黃祥興，因為佢係法國人發音會準確啲。」
又同外國人大講流利法文(TVB電視截圖)
(TVB電視截圖)
楊證樺學法文就請教黃祥興(IG圖片)
楊證樺於劇中角色原來係癡心情長劍，佢率先劇透話：「我角色同女友之後會有誤會發生，但最後會係Happy ending！」楊證樺表示要「談情說愛」係呢套劇最大挑戰，事關佢以前演嘅係大奸大惡、專業人士角色為主，他說：「有幕戲會係機場天台拍，都幾浪漫，同埋要就翻magic hour先拍得靚。」
(楊證樺IG圖片)
《機場特警》每個角色拎住枝槍巡邏都似模似樣，原來經過訓練，楊證樺稱：「要喺好短時間，大約6、7日入面做到機場特警嘅感覺係一個挑戰，換槍、行路嘅姿勢都好有學問。劇組仲特地搵咗之前嘅特警黎sir（黎家智)同裘哥（何鎮裘）幫手訓練，令我獲益良多，學咗好多新知識。」
(TVB電視截圖)
劇集入面深藏不露，原來真人都一樣周身刀，前排楊證樺喺屋企幫小朋友剪頭髮，唔少網友先知原來佢曾經於紐約任專業髮型師。其實楊證樺相當多才多藝，13歲已經童星入行，第一套劇集係澳門電視台的《闊少爺當差》，同時又識跳舞，之後佢到美國升學，兼學埋剪髮手藝，95年仲幫過美國華裔小姐opening排舞，轟動過當地唐人街添呀！
相關新聞：楊證樺曾於紐約任專業髮型師 綠葉背後百足咁多爪係食店老闆
(Facebook圖片)
功架十足！(Facebook圖片)
撰文：羅慧怡
責任編輯：楊安莉