香港警務處處長鄧炳強日前接受作家屈穎妍同導演高志森專訪，大爆自己曾有份參演高志森執導嘅處女作《開心鬼》。鄧炳强一見到高志森就急不及待相認：「其實三十幾年前我見過你，仲拍過你嘅戲。」高志森完全諗唔起大家見過，追問鄧炳強佢係演咩角色。鄧炳強就答：「我係男主角……旁邊嘅一個朋友。」
(高志森微博)
(圖片：受訪者提供)
(網上圖片)
鄧炳強接受訪問閒聊間，透露當時自己讀緊大學，跟同學拍戲賺外快，一日收入有700蚊，嗰陣嚟講都可以話係非常可觀。不過對於36年後嘅一哥嚟講都係濕濕碎，事關根據公務員事務局網站顯示，一哥一個月嘅薪酬最少有$295,150，換言之約一萬銀一日，逗緊嘅日薪係舊時嘅14倍左右。高志森接受《晴報》電話訪問時表示︰「《開心鬼》係我第一套執導嘅電影，當年第一日喺廟宇開工，一哥做特約演員，無諗過36年後又再拍佢，但佢已經唔係特約演員，係一哥，人生就係充滿緣份。」高志森又憶述︰「當年佢拍咗四日戲，應該有2,800蚊人工，相對於依家兩萬蚊左右，算係唔錯㗎！（覺得佢演技如何？）算係交得足戲，只係Take咗兩次。其實我第二套電影《聖誕快樂》，一哥都有份做特約演員，應該係監製同副導演都覺得佢做得好，所以第二套戲又預埋佢，但我搵唔番條片，好大機會出街版本cut走咗。」原來是特約演員不是臨時演員，難怪字幕都有他的名字出現。
相關新聞：【機場特警】大眼教官招Sir生面口係新演員？ 黎家智任顧問 曾保護國家元首
有幾分似錢小豪。(電影截圖)
左一就係18歲嘅一哥。(電影截圖)
(高志森微博)
字幕都有佢個名。(電影截圖)
電影《開心鬼》1984年推出，係高志森嘅處女作，主演嘅有黃百鳴同李麗珍等。高志森即刻睇番自己當年嘅巨製，話第一場拍古廟嘅戲就見到鄧炳強嘅蹤影，電影片名演員名單亦有鄧炳強出現。
鄧炳強喺片中同一班朋友講鬼故，佢演嚇親嘅戲份時瞪大眼，瞪到對眼跌出嚟咁滯，演技仲搶過主角。霎眼睇，鄧Sir仲有啲似打星錢小豪，完全係畀警務工作耽誤咗佢嘅演藝事業，繼續做分分鐘爆紅呀。
相關新聞：【機場特警】關禮傑懦弱「好姐」變絕世好爸 「最重要兩個女心正和懂事」
錢小豪(網上圖片)
鄧炳強經常都同娛樂圈扯上關係，早前鄧炳強同明星足球隊藝人晚宴，幾位知名演員包括成龍、譚詠麟及曾志偉都在場。鄧炳強睇嚟同佢哋好Friend底，搭晒膊頭合唱《朋友》，佢仲話自己係「睇吓睇吓」成龍同方中信飾演警察先識做警察，又話自己喺區議會上「講嘢咁叻」，都係睇曾志偉《開心字典》學。
一哥同娛樂圈好有淵源。(明星足球隊飯局影片截圖)
撰文：黃蘊姿