《法證先鋒IV》就嚟播完，有消息話TVB見到經典神劇拍續集多數都收得，所以正喺度密密度緊拍《刑事偵緝檔案V》！如果真係出第5輯，唔知會唔會用返原班人馬呢？如果會嘅話，有冇邊個第1至3輯嘅女演員個樣隔咗成最多25年都冇乜變過，甚至靚咗？
Mandam雷-林漪娸
林漪娸雖然已經60歲，但身為1980年香港小姐競選殿軍嘅佢已經證明咗天生基因好。而且佢好鐘意行山，可能因為成日運動，佢就算素顏上陣都冇變樣，一向有「港產美魔女」之稱，同後生15歲嘅徐榮做演夫婦都毫無違和感。
Gigi-蘇玉華
蘇玉華同樣已經52歲，曾經喺《錦繡良緣》飾演賢妻良母周夢嫻深入民心，自此被網民封為「古裝美女」、「一代美人」，依家都仲keep得非常好！
柏恩桐-陳法蓉
陳法蓉已經53歲，佢係1989年香港小姐競選冠軍，美貌依然，不過好多人都話佢留咗長頭髮唔認得佢。
藍嘉文-郭藹明
郭藹明雖然已經52歲，不過身為1991年度香港小姐冠軍嘅佢一向被認定係美貌與智慧並重嘅女藝人，如果佢肯出返嚟拍，肯定好多劇迷都舉腳贊成呀。
于小愉-吳美珩
吳美珩又叫做「美人」，雖然已經退隱娛樂圈做咗闊太，不過一日比一日靚，47歲嘅佢keep得非常好。
翠兒-汪琳
汪琳42歲已經生咗2個小朋友，但個樣仲好似「電波少女」嗰陣咁童顏，令人好羨慕！
Daisy-梁詠琳
梁詠琳已經淡出咗幕前好耐，但佢嘅近況大家依然關心，早排佢同黎芷珊合照，就有好多人驚訝佢冇走過樣。
美賢-黃𨥈瑩
黃𨥈瑩喺1994年參選香港小姐，獲得最上鏡小姐，依家44歲，個樣一日比一日靚，唔怪得佢成為古天樂惟一一個願意承認嘅女朋友。
曉欣-陳芷菁
陳芷菁已經「登五」，但近日佢就初嘗小性感，著咗紅色低胸長裙，好有氣質，諗唔明點解佢喺1994年香港小姐競選12強止步。
周詠欣-張沅薇
張沅薇不嬲都以大眼美人見稱，好早就退隱嘅佢原來轉行做咗知客，但早排佢出席兒童節目同事聚會嗰陣仲好靚女，唔知會唔會復出？
外表大變例子：
小柔–黃悅
黃悅以前殺讚秒殺好多花旦，但自從息影去外國做瑜伽大師，40幾歲但風采依然。
棠棠-黃美棋
美棋BB雖然只得30歲，但可能佢入行太耐，處事甚至外表都比較成熟。
(圖片來源：TVB電視截圖、各大藝人社交平台截圖、東星圖片)
撰文：張芷晴