2011年梁詠琪（Gigi）邂逅老公Sergio，同年認嫁老公閃婚。Sergio為愛妻，離開家鄉西班牙，嚟到香港呢個陌生嘅城市定居，2018年更為三歲女兒Sofia（祈淑菲），放棄大公司嘅高薪厚職，投身業務性質完全唔同嘅童裝零售業。Sergio為Gigi喺香港落地生根，Gigi大受感動亦都好識做，一有假期就跟隨老公返西班牙探親，頻密往返兩地。
（梁詠琪 IG）
今年農曆新年Gigi一如既往返去西班牙度假，而因為新冠肺炎（武漢肺炎）疫情，囡囡Sofia嘅學校亦一直停課，Gigi一家三口就一直留喺西班牙順道「避炎」兼慶祝埋囡囡生日。
（梁詠琪 IG）
疫情持續蔓延，全球肆虐，歐洲近期更出現大爆發，西班牙亦成重災區，當地政府前日（14日）宣布進入緊急狀態，喺全國範圍內實施為期15天的「鎖國」措施。全國4,670萬人若非返工、去藥房或醫院，或者為咗買糧等必要物品同服務，必須逗留在寓所；若非行動不便而需要同行者，外出必須單獨行動。
唔少粉絲都好擔心Gigi走唔到，不過原來Gigi有工作在身，上周趕及喺封城前兩日已經舉家返港：「其實因為3月份香港有工作，所以一家係3月頭已經回港。我哋因為係探家人，所以喺西班牙都主要逗留喺Sergio嘅家鄉小鎮，冇喺首都馬德里逗留。」
（梁詠琪 IG）
（梁詠琪 IG）
日前Gigi喺社交網上載片段，分享自己外出工作會帶嘅裝備。片中見Gigi帶埋一篋仔開工，除咗喺身上掛有流動空氣淨化機外，還有消毒火酒、搓手液、空氣清新劑及為手機笠上防水袋，做足保護措施！佢仲留言提醒大家：「出去工作要帶齊防疫用品，好好保護自己。」
Sofia5歲大個女，會幫爺爺嫲嫲做家務！（梁詠琪 IG）
西班牙係繼意大利後，疫情最嚴峻嘅歐洲國家，周日急增2,000宗確診病例。Gigi坦言非常擔心身處當地的家人:「我哋有不停提醒佢哋要戴口罩同洗手，注意家居清潔。喺爺爺嫲嫲家時，Sofia都有幫爺爺嫲嫲手掃地同清潔家居。回程航班我哋都有有做足安全措施，帶口罩同清潔座位以及雙手。Sofia都好合作，知道依家有病毒，明白唔可以亂摸口罩同口鼻。」Gigi最後寄語希望世界各地疫情盡早受控，人人身體健康！
Sergio家人（網上圖片）
撰文: 黃蘊姿