昔日香港女性加入警隊被社會視為新奇有趣的職業，不過後來發現喺處理某啲事務方面，女警比男警更為合適。初時女警主要負責涉及女性及少年嘅個案，以及危險程度比較低的職務。
（網上圖片）
1990年代初期，警隊推出「陀槍師姐」試驗計畫。被挑選者會先被派駐衝鋒隊6個月，再評估其工作效率及個人感受等決定合唔合適「陀槍」。
1995年1月1日起，新招募嘅女性警務人員必須接受槍械訓練，並且佩槍執勤。上述日期前，女性警務人員可以選擇是否接受相關訓練，以裝備佩槍執勤 。
（網上圖片）
1998年播出嘅《陀槍師姐》就正正係呢個特別變化背景下創作出嘅古仔。關詠荷飾演已經做咗好多年嘅女警娥姐，可以選擇執勤時陀槍與否；而滕麗名飾演嘅陳三元就係新紮師姐，一出學堂已經陀槍。故事就圍繞住兩個陀槍女警發展，更帶出新時代女性唔再「嬌滴滴、做花樽」嘅自強信息。
（網上圖片）
《陀槍師姐》當年一出即大受歡迎，成為警匪劇經典，去到2002年仲拍到續集《陀槍師姐IV》。事隔18年，無綫日前正式開拍《陀槍師姐2020》，不過唔再延續之前嘅故事，而係有一個全新嘅劇本同演員陣容。
滕麗名與朱咪咪（網上圖片）
除了滕麗名、朱咪咪和李成昌（飾演頂爺）之外，其他頭幾輯比較重要的人物全部冇晒。而佢哋嘅角色都唔再係陳三元、二妹姐同頂爺。
李成昌飾演頂爺。（網上圖片）
李成昌日前喺社交網曬劇中造型。（李成昌IG）
不過劇組就搵番幾位有分量嘅藝人返嚟擔正，邀請離開無綫三年嘅羅仲謙，仲有已經兩年冇劇出街嘅陳豪，仲有洪永城、黎諾懿、陳敏同宣萱，陣容都非常吸引！不過都有網民話冇咗歐陽震華、關詠荷同魏駿傑嘅《陀槍師姐》都唔再係《陀槍師姐》，已經搵唔番嗰份情懷咁話。
陳豪當年喺《陀槍師姐III》係飾演奸到出汁嘅古惑仔。（網上圖片）
撰文：黃蘊姿