無綫「金牌監製」梅小青經歷超過四十年的歲月，由助理編導攀至依家身為無綫戲劇製作總監。
效力無綫期間，喺佢手中出產嘅經典不計其數，李嘉欣主演嘅《原振俠》、周海媚主演嘅《今生無悔》、林家棟主演嘅《娛樂插班生》、蔡少芬主演嘅《洛神》、佘詩曼和陳豪主演嘅《公主嫁到》等，全部都係港人嘅集體回憶。
梅小青與丈夫劉家豪
而同佢同樣係監製嘅丈夫劉家豪亦創造出無數經典劇集包括《他來自江湖》及《溏心風暴》等，二人被稱為電視界「神鵰俠侶」。
小青姐（左）喺圈中多年廣結人緣，米雪係佢嘅知心好友。
劉心悠（左）都因為《宮心計2之深宮計》與小青姐結下劇緣。
不過日前梅小青突然宣布退休，全因阿仔劉鎮然（Alfred）落Order。Alfred咁緊張，因為眼見母親梅小青曾因腦血管栓塞，半隻腳踩入鬼門關。梅小青指2018年喺橫店拍《宮心計2之深宮計》時經常耳鳴，仲試過喺公司暈低幾次，睇咗幾個醫生都搵唔到原因。後來睇咗個名醫先知係左腦有血管塞咗95%，萬一中風，右邊身會癱瘓:「當時我都未識驚，因為《深》要趕住送檢，諗住剪埋《深》啲片先去做。」
《宮心計2之深宮計》都係佢嘅得意作品。
直至2019年2月，梅小青接受手術，手術後，醫生告知手術時發現塞嘅位，喺腦血管轉彎位，增加手術嘅難度，所以即刻安排急救措施，萬一手術失敗，要喺半分鐘內同我急救，佢話自己嗰時先識驚，真係喺鬼門關行咗一轉。
阿仔Alfred全程陪住媽媽，照顧入微：「因為個仔陪住成個過程，知道好危險，所以下令要我退休。由做完手術至今，呢一年過渡期冇事，其實個天已經畀咗兩次機會我，我之前都試過大病一場，加埋今次，我覺得自己真係好好彩，要好好珍惜。」
阿媽得一個，梗係緊張啦！
《法證先鋒4》成為咗佢嘅告別作！
梅小青向來做事追求完美，對自己要求愈來愈高，重返無綫後拍出兩部作品《宮心計2之深宮計》及《法證先鋒4》佢已感心滿意足：「返嚟TVB，我好感激杜之克（無綫副總經理）同李寶安（無綫行政總裁）嘅大力支持，令我工作更得心應手。雖然離開呢個崗位，係好唔捨得，但真係係時候要過一啲自己想過嘅生活，例如做義工，同埋湊一對孫，享受弄孫樂。」
梅小青一對孖生孫仔勁得人鍾意！
係時候享吓兒孫福啦！
圖片來源：梅小青微博
撰文：黃蘊姿