「武漢肺炎」疫情擴散全球，截至29號香港確診個案已累積至8宗，香港人出門時都人人自危戴上口罩。而香港連日嚟口罩搶購潮不斷，市民通宵大排長龍嘅情景屢見不鮮，有商家更將口罩價錢炒高幾倍，一「罩」難求。
（唐詩詠IG）
普通市民買唔到口罩，連明星都唔例外。唐詩詠就喺IG表示自己買唔到口罩：「買唔到口罩、搓手液和消毒藥水。」
（唐詩詠IG）
之後詩詠Post咗一張林子善嘅相：「得番20個口罩，要慳住使，有咩事就上門搵我，但係要經過蛋蛋（唐詩詠愛貓）嚴格嘅檢驗，呢位人兄就過唔到！」
（唐詩詠IG）
之後唐詩詠話唐爸爸終於搶到一盒口罩，但就誤買劣質貨，買唔到口罩，就寧願唔出街：「爸爸話搶到呢一盒，朋友話呢啲係劣質，所以我揼咗。我同爸爸講，需要返工嘅人更加需要口罩，我哋留喺屋企，唔好去咁多街，有咩我去買，你幫我同3隻貓玩得喇，講完佢就抱住蛋蛋入去沖涼，依家佢心入面只有蛋蛋！」
（唐詩詠IG）
唐詩詠喺香港買唔到口罩，另一邊廂有唔少藝人出國「撲貨」。近日飛到泰國嘅周家蔚就心繋香港，幫朋友搜羅衛生用品。除咗50支酒精搓手液之外，仲大手買入口罩，不過大頭蝦嘅佢，原來擺烏龍買咗淨係防到花粉嘅小朋友口罩：「希望帶到正能量給大家。我在泰國買到的都會盡量買，雖然今日買錯咗只防花粉嘅小朋友口罩，仲要買咗30幾包添，但係我會努力加油盡量買多啲返嚟畀你哋。」
（周家蔚IG）
另外，鄧穎芝去美國度假時得知香港鬧「口罩荒」，於是四出搜尋口罩，不過就發現已經畀內地遊客搶晒，鄧穎芝去咗20幾間藥房都買唔到一個口罩。
（鄧穎芝IG）
於是佢就將目標轉去喺香港同樣缺貨嘅酒精搓手液，更做埋代購：「我真係每日揸幾個鐘頭車周圍去搵，好辛苦先入到100支，但係都唔夠貨，有啲客想要10支，可能我只畀得2支。不過我都託咗當地朋友，如果有貨就幫我買，再寄嚟香港。」佢指自己冇賺過任何錢，只係收番原價再加少少油錢。
去返以物易物嘅年代……（鄧穎芝IG）
有人急急搶，都有人一於少理，處之泰然，好似陳彥行咁，話暫時夠用就得，驚都冇驚過：
唉 唔好係又搶唔係又搶啦
暫時夠用就得啦
口罩會返貨㗎嘛
留返啲畀真係完全冇口罩嘅人買啦
我都只不過係爆發疫情之前買咗一盒口罩
就用到依家喇
(本人不嬲都會買定一盒口罩擺喺屋企stand by嘅習慣)
依家非常時期冇咩事就唔好出街
咪慳啲用口罩囉（網上圖片）
撰文：黃蘊姿