原名何傲兒嘅何天兒2007年參選《香港小姐競選》時獲得「旅遊大使獎」後加入TVB，之後參演多套劇集，並於2015年離巢前拍嘅一套《波士早晨》喺2018年先播出，喺劇中放低靚女身段扮醜嘅佢被大讚專業，當時唔少人都大讚佢演技好呀！
（網上圖片）
之前大家都一直將Focus放喺佢嘅緋聞上，最令人印像深刻係傳何天兒同相差51歲嘅林建明譜出一段「爺孫戀」，後來佢仲無懼緋聞，高調加入林建明嘅大名娛樂做旗下藝人。另外仲有同富二代同子揚拍拖不歡而散，周子揚隔空數何家，當時都好轟動。
何天兒與周子揚（東星娛樂）
何天兒與林建明（東星娛樂）
近年何天兒積極往內地發展，佢形容內地所有團隊同配套都好好，多咗好多見識。至於感情方面，佢轉戰內地之後變咗緋聞絕緣體，而佢自己亦都話要專注工作。何天兒成功喺大陸吸咗一大班粉絲，除咗佢嘅靚樣之外，佢白滑嘅皮膚同高挑嘅完美比例身材都令佢大受歡迎！
（何天兒微博）
不過何天兒並唔係天生就好身材，佢話自己其實係易肥體質，因此幾乎每天都喺度減肥！佢表示自己以前18歲BABY FAT時期為咗要拍攝，急住瘦，三餐淨係食「烚蛋+西蘭花（花椰菜）」，最後兩個星期就爆瘦十幾公斤，不過何天兒就話呢個方法佢非常不推薦，仲話因為自己嗰陣好唔健康，不但有脫髮現象，臉色亦好憔悴。
（東星娛樂）
佢試過為咗行泳衣騷用2星期由120磅減到105磅。佢當時話希望大家有新相用，唔好再用佢選港姐時嘅「肥豬豬」相，睇嚟佢都相當介意呢個黑歷史。何傲兒話嗰兩星期佢戒油、鹽、糖同肉，不斷食烚嘅嘢，隔日做運動，連牛奶豆漿都唔敢飲。
（何天兒微博）
何天兒覺得自己瘦啲自信高啲。佢每年都會斷食一次：「斷食兩星期，只係飲果汁同固體營養劑。」
（何天兒微博）
不過佢依家嘅減肥方式健康咗好多，每日食Living Food搭配運動，仲不時喺自己社交網同粉絲分享佢會食啲咩嚟美容同減肥。
（何天兒微博）
撰文:黃蘊姿