由中國東北Hip-hop歌手董寶石創作、混雜了東北Rap和廣東話歌詞的「2019年大陸第一『神曲』」《野狼Disco》，其中嘅廣東話歌詞由於係由北方人創作，幾乎每一粒字都唔啱音，識得廣東話嘅聽完真係得啖笑。不過呢首《野狼Disco》喺大陸紅到發紫，由於曲風非常洗腦又輕快，佢嘅MV播放量好快就已經去到10億次，非常誇張！
（William MV截圖）
中港歌影視紅星陳偉霆（William）早前都跟住翻唱呢首歌，仲用好藝術嘅手法拍埋MV，有俊男、美景同靚歌，好多大陸網民都大讚佢「一開嗓就唱出正宗港味」，好想聽佢唱一次Live加跳舞咁話！
（William MV截圖）
日前江蘇衛視就滿足晒佢哋2個願望，事關佢哋嘅跨年演唱會請嚟《野狼Disco》嘅原唱者董寶石，同William一齊演唱呢首歌。William慢慢由華麗嘅舞台升上嚟，一出場現場觀眾已經嗌到聲沙。
（江蘇衛視跨年演唱會截圖）
（江蘇衛視跨年演唱會截圖）
着上一套又閃又金燦燦西裝外套嘅佢，手執一枝玫瑰花，好似漆黑中嘅螢火蟲一樣咁鮮明、咁出眾，再配合「陳偉霆式」舞步，成功炒熱全場氣氛。董寶石後來出場Rap，觀眾眼球都離唔開William。
William招牌舞步。（網上圖片）
始終如一。（江蘇衛視跨年演唱會截圖）
中間仲有歐陽娜娜活潑過場同William互動，點綴一下。不得不提嘅係後面一群伴舞嘅大媽，唔少人都話佢哋係William呢朵牡丹嘅綠葉，顯得佢更Sharp、更有Passion。
大媽群舞。（江蘇衛視跨年演唱會截圖）
突然有一位大媽一枝獨秀。（江蘇衛視跨年演唱會截圖）
突然有一位大媽突圍而出，同William跳起舞上嚟，原來呢位唔係咩普通大媽，而係Ｗilliam媽媽，兩人合力為現場觀眾炮製驚喜。陳偉霆表示，自己連續3年為江蘇衛視跨年晚會演出，所以今次帶埋媽媽一齊登台，感受氣氛。
（江蘇衛視跨年演唱會截圖）
William出名孝順，有筍嘢梗係要益阿媽！（東星娛樂）
精彩有片睇：
撰文：黃蘊姿