現年28歲嘅蔡思貝，被稱為無綫新一代「發電廠」。自入行起，幾乎每次拍劇或綜藝節目，都會同合作嘅男星扯上關係。近日就有傳佢同29歲歌手胡鴻鈞撻着！據知二人自舊年合作拍無綫節目《降魔的捉妖遊戲》時開始熟絡。
（蔡思貝IG）
有傳媒影到胡鴻鈞同蔡思貝10日內單獨約會3次，並做思貝嘅私家「柴可夫」接送佢到港九各區，仲細心咁買埋小食返上車畀思貝醫肚。當記者現身追問兩位係咪拍拖時，二人神色緊張兼不斷擋鏡頭，唔多似普通朋友咁簡單。胡鴻鈞就解釋話同思貝都會成日同一大班朋友一齊，但同思貝特別投契所以會單獨約出嚟都好正常咁話。胡鴻鈞仲解釋話係順路車思貝一齊開工，但其實近大半年Hubert遭公司「雪藏」冇工開，之後又改口話返公司開會，仲叫大家唔好亂估。
（蔡思貝IG）
被問到二人係咪了解中同埋有冇機會發展嘅時候，佢哋都好似夾好晒口供，話「唔知、唔諗」同埋「大家做嘢忙」嚟迴避問題。
（蔡思貝IG）
全城都以為蔡思貝同余德丞先係一對，勢估唔到佢同胡鴻鈞仲Close過同德丞呀！蔡思貝入行多年，憑住佢開朗熱情嘅性格迷倒唔少男星，其中同排舞師麥秋成嘅戀情可以話係最出面，經常被拍到出雙入對，思貝仲揸埋麥秋成登記嘅座駕出巡，關係不言而喻。
（麥秋成IG）
（網上圖片）
不過之後有傳因男方頂唔順思貝身邊咁多異性朋友兼緋聞多多，狠與女方斬纜。
而周志文同蔡思貝因拍攝電視劇《衝線》結緣，蔡思貝曾被記者影到上周志文嘅寓所過夜。不過周志文事後解釋寓所內有其他朋友一齊，但當時單身嘅佢都直認對女方有好感！
（周志文IG）
另外，人夫同人哋男友，王浩信、羅仲謙、洪永城同張振朗都曾被指同思貝過從甚密。
撰文：黃蘊姿