尋日賭王何鴻燊四房兒子何猷君宣布大陸名模太太奚夢瑤一索得男，為何氏家族誕下第五代男丁，更一圓賭王抱男孫夢，賭王更親自為長孫取名何廣燊。
（何猷君IG）
據知BB是前日出世，四房總動員隆重其事到齊迎接呢個金叵羅，猷君表示賭王畀呢個長孫嘅第一份禮物就係繼承何鴻燊個「燊」字，而猷君嘅兄弟姊妹每人都送咗一隻表畀BB。猷君多次表示好多謝老婆咁辛苦十月懷胎幫佢生咗B仔，問到佢會點樣獎勵老婆奚夢瑤嘅時候佢更加明言出手一定唔會輕，要慢慢諗送啲咩畀佢。
（何猷君IG）
唔少人嫁入豪門後都「母憑子貴」，不論生男生女，夫家都會心存感激「獎勵」媽媽。
徐子淇
徐子淇為李家前後生咗四胎，生第三胎老公李家誠贈送咗一枚價值約五千萬嘅廿五卡鑽戒畀太太，佗第四胎時又特意喺美國洛杉磯比華利山購置過億元獨立屋，作為對子淇的獎勵。
（徐子淇IG）
（徐子淇IG）
甘比
甘比08年為劉鑾雄（大劉）生下囡囡，大劉買粒7.03卡價值7,400萬港幣藍鑽，並以女兒英文名命名為「Star of Josephine」，之後又送間1.8億的山頂獨立屋同兩個總值1.5億的澳門豪宅御海．南灣單位。後來甘比再生一個囝囝，大劉闊綽送3億豪宅作為獎勵。後來甘比成功「坐正」獲大劉分配五成華置股份及商場物業，一躍成為香港女首富。
（甘比IG）
呂麗君
劉鑾雄（大劉）前女友呂麗君為佢誕下慈菇椗。大劉的得力助手甘比於08年10月誕下女兒，令呂麗君「失寵」，但母憑子貴重拾大劉歡心。大劉更豪擲4.2億購入英國最豪華住宅區伊頓廣場一座樓高6層的白色大宅送畀呂麗君。不過最後大劉因為呂麗君對物質苛索過度，加上想保護甘比而同呂麗君斬纜。
（東星娛樂）
（東星娛樂）
李嘉欣
「最靚港姐」李嘉欣2011年為許晉亨（香港船王許愛周之孫）誕下兒子Jayden Max。有指李嘉欣生仔後收到1億港元現金，以及價值200萬嘅鑽戒。
（李嘉欣IG）
諸葛紫岐
諸葛紫岐2012年下嫁Neway太子爺薛嘉麟。生咗細仔Andersen後，薛嘉麟贈送價值2億兼有無敵海景嘅四千呎豪宅。
（諸葛紫岐IG）
（諸葛紫岐IG）
撰文: 黃蘊姿