台灣「盛產」氣質寶島美女，多年來唔少台灣玉女都被發掘嚟香港拍戲，70年代有大美人林青霞；90年代代表有王祖賢；而80年代就有清純玉女戴良純。
戴良純（網上圖片）
1980年邵氏電影公司到台灣招考新人，22歲嘅戴良純原本讀緊大學航運系二年級，因為被邵氏錄用簽咗5年合約，從此離開校園赴香港發展，走上演藝之路。1981年，戴良純參演咗第一部電影，金馬影帝李修賢執導嘅《單程路》，同年再拍咗《童軍樂》同《打雀英雄傳》，喺影壇初露鋒芒。可惜佢嘅情路同人生冇佢嘅演藝之路咁順利。1982年戴良純與劉永合作電影《三十年細說從頭》後相戀並結婚，一對金童玉女羨煞旁人。
相關新聞：劉永遭內地嫩妻狠撇分身家 老年第三度離婚帶幼子回港生活
二人因合作拍戲互生情愫。（網上圖片）
82年劉永客串戴良純主演嘅電影《青春1000日》中曾有兩人結婚嘅場口。（網上圖片）
原本大家都睇好佢地有美滿婚姻，但係好景不常，有指婚後劉永性格大變發生家暴，戴良純更避走台灣投靠家人。劉永懷疑有人「出軌」，追到去台灣用刀、叉將戴良純刺傷令佢臉部毀容。劉永「清醒」之後非常後悔，即刻抱戴良純入院急救。劉永捶胸頓足向戴良純道歉，但戴良純嘅父母堅決追究告上法庭。戴良純曾同意以600萬台幣和解，但之後推翻供詞再告佢殺妻未遂，法院亦判處劉永2年6個月有期徒刑，而劉永上訴前潛逃返港，而且仲繼續喺香港演藝圈發展。
（劉永微博）
因為港、台兩地冇引渡協議，所以劉永可以避過受法律制裁，根據台灣刑法，犯最重本刑為1年以上3年未滿有期徒刑之罪，追訴權時效為10年。所以2011年劉永仲可以返去台灣出席金馬獎。另有指戴良純曾表示劉永最後只係賠咗10萬元台幣（約2萬5千港元）。
相關新聞：《十二傳說》前夫「第三春」娶細30歲嫩妻 黎燕珊單親媽媽育仔女成才
（東星娛樂）
92年劉永再娶亞姐出身嘅黎燕珊，二人育有一仔一女，2000年有傳黎燕珊難忍劉永家暴而選擇離婚。
（劉永微博）
劉永07年再娶咗細佢30歲嘅大陸嫩妻並定居深圳，育有兩個分別12同8歲的囝囝。近日爆出大陸嫩妻狠撇劉永，並分佢喺大陸嘅一半物業，而兩個小朋友就跟劉永返港生活。
（劉永微博）
另一邊廂，戴良純之後嘅感情路都好坎坷兼奇情，佢喺台灣另覓醫生男友顏三元，但拍拖後有感男友（有傳兩人已婚）唔係好人，同樣被家暴，仲有指戴良純多次為男方墮胎，最後二人分手收場。後來戴良純認識咗一位日本醫生小林守，1992年結婚並到日本定居，但顏三元死心不息追到日本，同年12月顏三元砍傷戴良純，仲喺戴良純面前殺死小林守。戴良純當時向傳媒展示佢後腦被砍嘅傷勢，喪夫兼受傷，但日本警方當時一度懷疑佢同前度串謀殺夫。
（網上圖片）
經過調查，戴良純洗脫了嫌疑，但小林嘅家人對佢好有保留，雙方打起官司爭奪遺產繼承權。最後戴良純繼承唔到遺產，但有傳佢獲得小林醫生近億元嘅保險賠償金。之後戴良純銷聲匿跡，下落不明。年前有人聲稱在日本見過戴良純，亦有說戴良純在上海出現，但均無法證實。兩個「愛」戴良純嘅男人最後都選擇咁樣傷害佢，實在令小編不禁諗起恐怖漫畫大師伊藤潤二筆下嘅《富江》……
（網上圖片）
撰文: 黃蘊姿