前無綫娛樂台主播林子博原本一家四口，有兒有女，幸福非常，沒想到今年4月突然傳來噩耗，太太董燕君（Shirley）被證實患上極罕見癌症「平滑肌肉瘤（腹腔）」第四期，癌細胞已擴散到不同的器官，必需立即接受化療。子博以正面積極的態度去陪伴太太抗癌，卻面對來自無綫的第二次打擊，公司決定不跟子博續約，令原本身為一家經濟之柱的子博頓時失業。在雙重打擊之下，子博沒有選擇迴避或者放棄，在身邊眾多朋友的支持下，正面面對生命的逆境。
子博面對人生中雙重打擊，他不禁冷笑：「應該是人生最低潮啦！唔好再低喇，頂唔住！」(《晴報》圖片)
太太患上罕見癌症，子博公開病情望找到醫治的方法。(圖片：受訪者提供)
子博認為無論如何，一家人都會積極面對。(圖片：受訪者提供)
子博接受《晴報》專訪的當日是他失業後的第一份工作，為驚慄體驗館揭幕禮擔任司儀，他感激身邊有很多關心他家庭的人。子博憶起太太得悉患癌的當下，他說：「其實我比佢仲早知道，我第一時間話畀個女知，個女雖然14歲，但都未係好理解到成件事，後來到醫院陪太太接受化療，個女問媽咪情況係點，佢就忍唔住喺地鐵車廂度爆喊，囝囝就好懂性，依家喺屋企充當娛樂大使，負責氹媽咪開心，佢為咗媽咪開心，不惜喺屋企裸跑。
其實我事前已經畀好多心理準備太太，話佢知原來癌症有得醫，不過都冇用，對佢嚟講係個噩耗。」太太呼天搶地失控狂喊，子博憶起太太的一句說話，都不禁流下男兒淚：「我最記得佢對我講第一句說話：『我唔捨得你哋！』佢將銀行帳戶、社交平台帳戶密碼全部交晒畀我，我同佢講：『你畀我做咩呢？你會好番呀嘛！』」
子博指太太拋下一句不捨，令他不禁落下男兒淚。(《晴報》圖片)
一家四口的幸福家庭沒想到受到接二連三的打擊。(圖片：林子博Facebook）
太太生病，子博能夠做的就是照顧好家庭，讓Shirley可以安心養病，他除了返工之外，朝早起身為子女準備早餐，接送返放學，陪太太睇醫生，買餸煮飯再完成家務，難免會休息不足，他說：「曾經因為咁經常發呆，有次幫太太打針，佢見到我發呆就爆喊問我：『老公，我係咪好煩？』當下我突然醒晒，發現原來自己帶咗好多負能量返屋企。」
禍不單行，子博上月突然不獲無綫續約，頓時加入失業大軍，雙重打擊之下難免會驚惶失措，但他當時最擔心的仍是太太，怕她承受不住，子博說：「我已經同佢講自己有手有腳，嚟緊都有些少工作安排，但佢真係崩潰，佢冇諗過自己因為個病上個月開始冇糧出，到依家輪到我。」他認為不續約是普通的商業決定，正常不過的事，自己在亞視和其他電視台都面對過，他說：「但當我見到太太有時攬實廁所馬桶不停嘔、全身骨痛、暈得天旋地轉，而我又幫佢唔到嘅時候，我望住佢背影就會自問：『點解公司要喺呢個時候炒我呢？點解唔畀我過埋呢關先呢？』」
相關新聞：【有工開】林子博開名感激雪中送炭 古天樂起過百小學成大慈善家
子博被請食「無情雞」，離開工作了11年的無綫。(圖片：林子博Facebook）
周日獅子會發起籌款活動，子博帶同太太和子女出席。（圖片：林子博Facebook)
幸好的是子博的新聞出街後，即時引起四面八方的關注，不少人都向他伸出援手，子博說：「第一位一定係多謝古天樂，佢唔係問我有咩需要，而係打畀我時已經為我安排好導演畀個角色我做。第二係好多圈中好朋友，A記同學會鮑起靜、江美儀之外，仲有方中信、余安安、張慧儀、汪明荃、鄭秀文、張衞健、梁漢文等等，另外有好多人暗中幫忙我，我是知道的。第三是平時見到嘅街坊，我屋企個業主立案法團主席，話將來我兩位小朋友的書簿費有困難，佢都叫我即管開聲。」
儘管跌落人生的谷低，子博仍然正面積極說：「我相信呢個世界係正面，因為好多人幫我，有好多人覺得今年我運滯犯太歲，但我覺得2019年我所得到嘅，比我失去嘅還要多。呢件事以來，我從未喺太太面前喊過，以前堅強係因為家人，依家堅強係因為所有周遭嘅人畀我嘅愛，我唔會畀自己冧。」
A記同學會敘舊，大家不忘為子博和太太送上祝福和慰問。(圖片：林子博Facebook）
在訪問的最後，我們邀請子博分別向太太和一對仔女講些說話，他同太太講：「既然咁多人幫忙，你都要正面地面對呢個病，你一定會好番，未來仲有好多事要同你一齊經歷，我哋要睇對子女結婚生仔，又要湊孫，我哋一齊加油。」他感激囡囡詠渝同囝囝卓楠在短短日子入面，讓他看到他們的急促成長，吩咐他們不要胡思亂想，爸爸可以應付家庭，著他們努力讀書。
子博仍然相信世界是正面，起碼一直有人願意幫他。(《晴報》圖片)
子博希望太太的病可以康復，回復正常的家庭生活。(《晴報》圖片)
場地：《Resident Evil 2: Infected Hong Kong》驚慄體驗館
撰文：楊安莉