84歲的殿堂級作家倪匡日前獲邀出席書展舉辦的講座，在台上演講期間, 倪匡突然爆出自己患上癌症，而且全身病痛多多，令不少書迷驚訝，但他卻抱著平常心面對。他在台上表示自己患上皮膚癌，而他接受媒體訪問時表示，有呢個病並唔係咩私隱，而且身體上都有其他大大小小嘅毛病，已經折磨咗佢幾十年。倪匡坦言，佢過去有就皮膚病問題睇過7個醫生，呢幾位醫生都對佢嘅病症有唔同睇法:「我身上有皮膚病，睇過7個專家，前後都睇了十幾年，其中有三個話係癌症，有四個話係濕疹，而家個塊皮膚上生左好奇怪嘅瘤，我決定由得佢唔切啦，反正我都咁老！」雖然依家喺患濕疹嘅位置生咗一個瘤，但佢最後都係決定採取唔理會嘅態度，打算當係濕疹咁醫，搽啲藥膏令感覺好啲就夠，因為佢覺得自己都老喇，有病都冇乜所謂，反正終有一日都係要離開。
（圖片：大會提供）
（圖片：大會提供）
（圖片：大會提供）
倪匡相信死後有靈魂
倪匡喺演講分享時, 話幫自己起咗一個外號, 叫「84匕翁」:「84係我嘅歲數，匕係匕首嘅匕，死字去咗一大半就係匕字，匕翁就係死咗一大半嘅老郎。」佢表示, 死後已經約好同好友古龍及三毛以任何形式互通消息, 因為佢深信人死後仲會有靈魂嘅存在, 不過至於係點存在, 佢就一無所知：「古龍頭七，就同三毛一直等，等到天光都冇出現，後來三毛都走咗；我發夢見過好多新朋友，就係冇見到他倆。」倪匡感慨說：「我生命嘅配額剩返好少，我而家行三分鐘嘅路就行唔到，每日嘅生活就係睇下報紙同書，陪下腦退化嘅老婆，一日好快過。」
（圖片：大會提供）
（圖片：大會提供）
(《東星娛樂》圖片)
(《東星娛樂》圖片)
甘願智力退化 陪腦退化太太「變回小孩」相守到老
倪匡喺講座提到患上腦退化症嘅太太時，倪匡表示只有兩條路畀佢揀，一係自己變成癲佬，二係自己嘅智力都有問題。而佢最後係選擇咗後者。佢表示兩公婆喺屋企時，會稱呼太太做「妹妹」或「豬豬」。而呢個稱呼已叫咗60幾年，已經改唔到口。依家倪匡太太會叫佢做寶貝豬豬，然後倪匡又會叫返佢太太做寶貝妹妹，個關係就好似初戀咁。
倪匡話依家都好少會出席活動，因為經常會掛住屋企嘅太太：「佢依家行為好似小朋友咁，記性唔好，佢有時問我今日係星期幾，我會答『星期八』，佢靜咗一陣，然後會話咁聽日係『星期九』，我哋就相望而笑。」佢又形容自己，自己會將唔如意嘅事情轉化為開心事：「身體嘅病痛係改變唔到，但精神嘅痛苦可以用腦部去決定，用意志力轉化，我可以做到。」