李麗珍因年輕時拍三級片而聞名，對上一套劇集已經係6年前嘅TVB劇《女人俱樂部》，飾演朱莉一角。直至近日，李麗珍再度復出拍ViuTV製作嘅電視劇《娛樂風雲》，戲份佔20幾集，與廖碧兒、袁富華、陳國邦、劉錫賢、徐肇平等人合作，將會邊播邊拍，同同時段嘅TVB處境劇《愛．回家之開心速遞》對撼。不過喺記者會上，佢突然對住記者吐心聲：「娛樂圈好現實，出道得耐會畀人話過氣女星，好似我個角色咁，即使有很多粉絲期待復出，但亦有好多人想睇我點死。現實生活一半半，可能有一半人希望我努力工作，但有啲唔鍾意我就想睇我點死，惟有努力撐落去。」
想當年李麗珍14歲就被發掘拍廣告，直至27歲為求事業突破，接拍咗三級片《愛的精靈》、《蜜桃成熟時》，馬上爆紅，其中《蜜桃成熟時》票房高達1200萬港幣，被好多影迷封為「三級片女神」。1996年，30歲嘅李麗珍經歷過4年短暫婚姻，離婚8年後突然被指介入已婚髮型師及其老婆嘅婚姻，其老婆仲出書爆料平時2女共侍一夫嘅3人行經歷，重重打擊咗李麗珍嘅演藝事業。不過李麗珍以53歲嘅年齡，個樣未有太大改變，臉上完全睇唔到歲月痕跡，保養得宜，復出應該會引嚟好多昔日影迷嘅支持。
其實除咗李麗珍之外，以下12位女藝人，大家聽到佢哋真實年齡實隨時會嚇一跳，大叫佩服。
吳婉芳
吳婉芳堪稱絕頂凍齡女神，生於1967年已經年屆51歲的她望落仲好似廿幾歲嘅女仔咁，凍齡30年，一舉手投足都仲好青春，非常屈機。Keep得咁好，因為底子都好好，1986年參加香港小姐競選，佢就一連奪得亞軍、最上鏡小姐同才華小姐3個獎項，證明佢美貌係獲得大家肯定。最重要係佢退出演藝圈約25年，一早遠離辛苦勞碌嘅拍劇生活，專心做少奶奶養尊處優，唔靚就假，難怪每次出入馬場都成為傳媒同市民嘅焦點。
袁詠儀
叫得靚靚就梗係正啦，1971年出世嘅佢已經47歲，不過同佢老公張智霖一樣兩個都唔識老。近日佢好有自信咁喺微博post咗張淡妝相，有網民為佢加咗美顏濾鏡，磨皮又大眼，而靚靚睇完冇buy不特止仲好反感。梗係啦，靚靚係1990年度香港小姐冠軍同最上鏡小姐，出道咁多年一直保養得宜，邊使呢啲嘢？同埋佢冇熬夜習慣，早睡早起，自己少啲皺紋！
王祖賢
有一種美到凄絕叫王祖賢，佢冰山美人嘅容貌直至依家仍迷倒唔少男粉絲。
郭藹明
時間真係過得好快，原來1967年出世嘅郭藹明已年屆51歲，但佢仲皮光肉滑，厲害。喺24歲嗰陣，佢已經贏得1991年度香港小姐競選冠軍、國際親善小姐同最佳談吐幽默獎；其後參選1992年國際華裔小姐競選又奪得亞軍同最佳民族扮相獎，係公認美女。同劉青雲拍拖時，甚至被人叫做「美女與野獸」組合嚟嘲笑佢哋嘅外表差異。所以話，直至依家邊個會估到佢51歲呢？
佘詩曼
1975年出世43歲嘅阿佘係1997年香港小姐季軍，直到依家過咗咁多年，佢連妝都可以唔化，就咁自拍放上網，你話幾勁。
溫碧霞
1966年出世，52歲嘅溫碧霞係唯一一個仲可以carry到露肩衫嘅女人，青春二字喺佢身上依然適用。中學未畢業，溫碧霞已經被星探發掘拍戲，仲有喺《封神榜》飾演妲己，又奸又靚嗰個樣深入民心。直至依家就算年過半百，溫碧霞都仲會泳衣上陣，甚至有唔少人覺得佢好正，大讚老齡嫩肌，就知佢個樣幾咁逆成長。
張可頤
港姐出身嘅張可頤曾經係「千禧年代無綫五大當家花旦」，年紀輕輕已經喺街度被發掘參演電影，因為樣貌清俗，曾被梅艷芳稱為「影壇新星」。生於1969年嘅佢依家49歲，無論是個樣定身材都仲係一個又靚又性感嘅熟女嚟。
關之琳
有著「大美人」稱號嘅佢五官輪廓深，無疑係位東方美人。
鍾楚紅
佢自然唔造作嘅迷人風采深植人心，深受影迷喜愛。
陳煒
每次煒哥一盛裝出席TVB節目巡禮、台慶、頒獎禮，都會引嚟網民熱烈討論，因為1973年出世經已45歲嘅佢外表仲keep得好好，而且身材玲瓏浮突，連少女都好羨慕佢！講返24年前，煒哥就已經以22歲之齡，大熱姿態下贏到亞洲小姐冠軍，及後隨即被亞視力捧做一姐，直到依家身為一個中女仍然魅力四射。
宣萱
48歲嘅宣萱喺1970年出世，自從同外籍男朋友分手之後，佢就下決心過返健康積極嘅生活同埋減肥，希望望落年輕啲。而佢亦都成功咗，個樣同20幾年前冇咩分別。
蒙嘉慧
23歲嘅蒙嘉慧原本同郭富城合作拍廣告，點知正正因為佢一頭烏黑長髮同清秀可人嘅樣貌得到杜琪峯賞識，所以佢先有機會晉身娛樂圈。1973年出世嘅佢年屆45歲，不過喺皮膚上完全睇唔出真實年齡，究竟蒙嘉慧嘅凍齡秘密係咩呢？
(電影截圖；TVB電視截圖；東星娛樂)