昨晚元朗西鐵站發生襲擊市民事件，數百名白衣人士公然在西鐵站內、月台上和車廂中揮動木棍等武器，暴力毆打乘客和記者，造成大批市民受傷。不少藝人和香港市民一樣，一直在網上留意有關新聞，今早10點由森美、小儀主持嘅電台節目《早霸王》, 節目氣氛變得比平日沉重, 森美講咗一句:「今朝早, 我冇說話好講。」之後更一度激動落淚。
節目開始時，森美就話：「今日嘅節目, 請各位原諒我嘅不專業。喺今日嘅節目裡面, 我真係唔可以做返平時節目會做嘅環節喇...我心裡面有種擔憂...」然後不禁落淚, 無法說話。森美嘗試盡快調整好自己情緒後, 再講:「我有好大嘅憂慮, 我開始有小小唔明白究竟我哋每一個人嘅身份應該要做啲乜嘢, 先能夠令到香港變返...香港。我希望香港每一個都努力。」
今日嘅《早霸王》節目內容，改為播放與抗爭有關及聽眾所點播嘅歌, 如本地組合小塵埃嘅《高地之下》、謝安琪嘅《山林道》及方皓玟嘅《假使世界原來不像你預期》等，還有讀出網民喺網上所發表對琴晚元朗打鬥事件嘅感受。
(森美Facebook)
森美除咗喺電台節目對琴晚元朗發生嘅事表達感受外, 亦有在個人社交平台上撰文回應元朗打鬥事件:「元朗，香港，到了昨晚不一樣了。我應當做什麼？香港オ會是香港？我迷惘、擔心、恐懼、不知所措。應該不止我，你也和我一樣吧！」, 有網民看到撰文後都紛紛激動回應:「真心好徬徨」、「請問還有誰能保護我們？我們還有未來？還有希望嗎？」、「面對緊一道高牆，冇力感好大丫」。
除咗森美對元朗打鬥事件發表感受外, 亦有其他903嘅DJ對元朗打鬥事件表示無奈, 並Po文發表感受。其中包括有唐劍康(Donald Tong)、朱薰等。
(唐劍康ig@donaldtong)
(朱薰@chufune)