劉小慧自從成為KOL之後，大受網絡觀眾歡迎，因為自稱「得閒修女」的她經常教大家生活小百科和健康的貼士，令大家獲益良多。小慧直播前就率先預告會講肚腩問題，她更「出賣」好朋友的照片，見她不露面的女性朋友四肢纖瘦，但竟然暗藏大肚腩，在旁邊同肚腩合照的小慧都不禁狂笑。
小慧見到好朋友100磅都唔夠但有個大肚腩，都忍唔住要影張相，同大家分享肚腩問題。（圖片：劉小慧Facebook)
小慧每次開直播都有教學，令人獲益不少。（圖片：劉小慧Facebook截圖)
小慧表示肚腩跟脾胃健康有莫大關連。（圖片：劉小慧Facebook截圖)
小慧晚上開直播時解釋，該朋友是很瘦的女生，體重不足100磅，有肚腩全因飲食習慣不太好。小慧表示肚腩除了缺乏運動而囤積脂肪外，很大機會是水腫，而水腫跟脾臟的健康有莫大關係，她說：「脾是負責運化，即時吸收晒食物嘅營養，然後派給畀其他五臟六腑，脾唔好，即係代表你吸收都唔會好，吸收唔好，代表你其他五臟六腑都唔會好健康。好多人去中醫求診，率先都係要先醫脾臟，因為脾臟唔好，連藥都吸收唔到。」小慧稱細女Ina脾胃一樣差，更自責是自己的責任，她說：「佢細個時候患咗中耳炎，當時我又唔太熟中醫，加上短時間要起飛去澳洲，擔心佢搭飛機耳仔會好辛苦，所以就想佢快啲好返，所以食西醫開嘅抗生素，結果佢抗生素太高度數，全身出晒紅疹，為咗壓制紅疹食中藥，所以好傷脾臟。」
小慧表示中醫口中的濕大多數是脾濕，自己都是容易脾濕的人，試過去旅行七日都冇辦法去大便，她說：「女性比男性多便秘問題，就是因為經常都會忍，出街廁所唔係成日都搵到乾淨，同我老公一樣，佢有潔癖，有時真係忍到返屋企先去，而長期成日忍大小便就令腸胃蠕動變慢。」
她透露脾濕導致不少的健康現象：
1. 有時候見到馬桶壁會黏住大便，大便稀爛;
2. 起身後面部水腫;
3. 食慾不振
4. 瞓極都唔夠，總係覺得好攰;
5. 好容易感冒
她說：「其實脾濕原因好多，因為香港環境本身潮濕，加上經常開冷氣同風扇，好易有邪風入體，而且香港人鍾意食甜、辣同凍嘅食物，咁樣最影響脾胃。」小慧表示要脾胃健康，就要注意飲食好好戒口，她說：「好多人飲祛濕茶，但要加糖，但其實脾臟係忌甜，所以飲祛濕茶同薏米水都唔好加糖，早餐可以食小米粥或者糙米，好易煮，加水煲十至二十分鐘就可以，好多人覺得糙米好硬難入口，其實可以煮之前浸耐少少，或者混入黑米或者白米一齊煮，煮冧少少，小米粥會飽肚唔脹肚，白飯就會脹肚。」
鄭秀文原來都會食小米粥做早餐。（圖片：鄭秀文微博）
病後的李珊珊都食小米粥做早餐養生。(圖片：李珊珊微博)
最後，小慧教大家一個按摩動作，能夠舒解便秘問題，有助減肚腩。就是每朝醒來後，繼續躺著蓋著被鋪，用掌心按實肚臍位置，如果雙手太冰冷就先搓熱掌心，有少少力順時針方向打圈，打足108個圈，她說：「試做幾日啦，包你廁所會去得舒服好多，個人輕咗又冇咁攰。」
小慧站立示範按摩動作，但她揚言可以瞓喺牀度做完先起身。（圖片：劉小慧Facebook截圖)
劉小慧的直播片段重溫：
https://www.facebook.com/winnielau0724/videos/345551679447388/