呢排《2019香港小姐競選》首輪面試引嚟大家好大迴響，無論係天使組，定係北方佳麗組都令人好驚訝。有網民就話近年港姐冇以前咁有仙氣，可能上一代都係無添加美女，散發出嚟嘅氣質都唔同啲，既然係咁，不如就根據網民意見，由近30年港姐冠軍（最新1年未選，故由2018年起計前30年）裡面抽出喺樣貌、學歷最正嘅8位出嚟，俾大家睇過。
排名不分先後
1991年冠軍：郭藹明
郭藹明曾經就讀名校嘉諾撒聖心書院，後來遠赴美國南加州大學修讀機械工程學。1991年，佢以雙碩士生身份參選港姐競選，一舉拎到冠軍、國際親善小姐同最佳談吐幽默獎。有指郭藹明曾經喺美國太空總署(NASA)做兼職見習工程師，不過郭藹明接受訪問時公開否認傳言，話自己只係喺私人航天業公司實習。
(TVB電視截圖)
(TVB官方截圖)
1999年冠軍：郭羨妮
郭羨妮係中英混血兒，讀過天神嘉諾撒學校同嘉諾撒聖瑪利書院，大學就讀於西門菲莎大學，主修心理學同經濟學課程。畢業後，郭羨妮做過空姐，1999年以大熱姿態贏到港姐冠軍、最上鏡小姐、國際親善小姐同千禧才智小姐4獎。跟住佢又喺美國拉斯維加斯贏到2000年度國際華裔小姐競選冠軍。其後佢仲代表香港參選環球小姐競選，並係最上鏡小姐競選前10名嘅佳麗。
(TVB電視截圖)
2012年季軍（民選冠軍）：朱千雪
朱千雪擁有8級鋼琴水平，就讀嘉諾撒聖心學校私立部，8歲隨家人移居加拿大溫哥華，畢業於西門菲莎大學商業和傳理系學士。2012年，朱千雪參加港姐競選，本來根據多方面民意調查，朱千雪先係「民選冠軍」，但因為網上投票系統伺服器發生問題，令佢只得季軍。其後，朱千雪埋首學業，先攻讀香港中文大學企業傳播社會科學碩士，再讀香港城市大學法律博士。
(TVB電視截圖)
2003年冠軍：曹敏莉
曹敏莉喺美國出世，中學讀嘉諾撒聖瑪利書院，之後返美國薩克拉門托留學。2003年，佢參加港姐競選，最後獲得冠軍、國際親善小姐、鑽石肌膚獎、芙蓉美態獎同完美組合獎（百變伊人組），成為5料冠軍。第2年佢出戰2004年度國際華裔小姐競選，獲得亞軍同友誼小姐。後來曹敏莉繼續進修，去紐約修讀為期半年嘅珠寶鑑證課程。
(曹敏莉微博)
2016年冠軍：馮盈盈
馮盈盈喺DSE考獲最佳5科28分嘅佳績，同年入讀香港大學食物及營養學系。畢咗業馮盈盈做過一排模特兒，直至2016年參加港姐競選，獲得現場最受歡迎佳麗獎同冠軍。翌年，馮盈盈贏得2017年度國際中華小姐競選季軍。
(TVB電視截圖)
2004年冠軍：徐子珊
徐子珊才能極多，4歲開始學跳芭蕾舞，14歲跳Hip Hop同Jazz，喺香港讀完中學就入讀美國加州大學戴維斯分校日文系。畢業後於2004年參選港姐，獲得冠軍、修身美態獎、最上鏡小姐同國際親善小姐4項大獎。入行TVB後，徐子珊係少數喺歌、影、視、廣告4棲都發展得成功嘅藝人，近年仲以半工讀形式，修讀心理學碩士課程，一邊工作一邊讀書，為期2年。
(TVB電視截圖)
1989年冠軍：陳法蓉
陳法蓉喺15歳曾因移民潮到加拿大多倫多升讀中學，大學時就讀多倫多大學酒店管理學士、夏威夷大學時裝布料設計學士學位，期間每年都憑優異成績而獲得獎學金，唔使交學費。1989年，佢返香港參加港姐競選得到冠軍，亦贏到國際華裔小姐競選亞軍。
(TVB官方截圖)
1988年冠軍：李嘉欣
李嘉欣喺澳門出世，父親Francis Reis係葡萄牙人，母親係上海人，佢中學嗰陣喺瑪利諾修院學校就讀，會考取得2A、7B佳績，其中英文同聖經勁到攞A。1988年，佢贏到港姐冠軍，同年仲贏到首屆國際華裔小姐競選冠軍，18歲已經係人氣王。咁多年嚟佢學識多國語言，如廣東話、上海話、英語、日語、葡萄牙語、意大利語，當中日語就拎到1級能力證書，據悉佢喺2009年修讀英語碩士課程並畢業。
(TVB官方截圖)