馬浚偉自編自導自演自監的首部電影作品《生前約死後》已完成拍攝，準備於11月公映，身為出品人兼製作人的他於前晚設煞科宴，筵開6席又派利市慰勞幕前幕後。馬浚偉真心辛苦，所有演員讚他充滿毅力、魄力和拼搏，做足功課，常一take過大大減輕演員負擔，他坦言整個過程艱辛卻開心，很謙虛地多謝幕後工作人員的配合與幫忙。新戲會參考去年舞台劇版，透過馬浚偉自身經歷，講述與媽媽相處相依的生活點滴，帶出一段感人肺腑的母子情。上次馬浚偉每次排練到演出，眼涙從未停過，不少朋友擔心他太思念亡母難以控制激動情緒；今次內容比舞台劇版更深入，令馬浚偉情緒好大衝擊，喊到似豬頭，更引致全身出疹，又痛又痕。其實馬浚偉之所以如此激動，同本身的經歷有關，自小他就要面對家人不同病患，常處於不安的狀態：如媽媽生前22年來被癌症折磨、細妹患上乳癌、快要分娩的二家姐妊娠中毒、剛出世的外甥腦部受損，面對這一切，馬浚偉寧願都發生在自己身上，曾陷入抑鬱驚恐一度尋死。
6歲起22年見盡癌母生不如死 陷入抑鬱驚恐一度尋死
馬浚偉是5兄弟姊妹中的細仔，年僅6歲其母就不幸患上鼻咽癌，要常常陪她出入醫院。見到媽媽病情穩定，馬浚偉加入娛樂圈，可是直至1995年，媽媽癌症第2次復發，頓時失去嗅覺、味覺、聽覺，又因電療失去一隻眼，另外一隻眼僅餘下1成視力，甚至頸部潰爛變黑，連說話時都口齒不清。有次媽媽腦抽筋，全身抽搐，膚色馬上變得瘀黑，最後被救回來。1999年，馬浚偉媽媽面部肌肉、牙骹壞死，張不開口灌營養奶，於是醫生建議做飲食導管手術。當時媽媽說很辛苦一直不肯做手術，但見到馬浚偉很傷心地哭，就決定動手術。雖然媽媽手術成功，惟4小時後卻因為細菌感染引發急性肺炎離世，48歲的她瘦到餘下40幾磅，馬浚偉到醫院時她還未打包。
22年來馬浚偉不但同父母同住，更加不會出街吃晚飯，趕住回家陪兩老，有事就馬上去醫院，怕媽媽一旦出現狀況，會來不及反應，連累她受苦。媽媽突然離世的陰影至今仍揮之不去，對馬浚偉很大打擊，他認定自己是罪魁禍首，結果同時患上抑鬱症、驚恐症。患抑鬱的8年，馬浚偉天天借酒消愁，曾經閃過自殺的念頭。為了面對抑鬱症，馬浚偉頭1年靠食血清藥物卻有嘔吐反應，他就用打羽毛球和跑步等方法靠自己康復。不過壞事一不離二，馬浚偉有日跑步突然驚恐症發作。發作頭10分鐘感到極度恐懼，好像被人嚇一跳一樣......開始頭暈、視線模糊、發不出聲音、心跳加速到如做心肺復蘇，然後換氣過度令二氧化碳含量過低，會感到麻痹、缺氧，難以呼吸。他將當時感覺比喻為心臟病發暴斃前一刻的感覺。馬浚偉話自己一周發作4、5次，已累積發作過1000次。
至親先後患重病 馬浚偉積極助人幫弱勢
馬浚偉為照顧癌母時已經每日活在惶恐不安中，媽媽死後更要飽受喪失至親之痛，又要抑壓住抑鬱症、驚恐症的發作。放家人在第一位的馬浚偉自小一家7口住在深水埗白田邨，閒時跟家姐細妹到公園玩蹺蹺板和滑梯，有深厚親情。怎料年輕的細妹患上第3期乳癌、快要分娩的二姐妊娠中毒、剛出世的外甥腦部受損，馬浚偉一直簡直承受著種種低潮。當時馬浚偉透過信仰得到安全感，終於瞭解到人終必一死，所以不必害怕死亡，但生前一定要好好活著，珍惜家人。
如今馬浚偉的抑鬱症、驚恐症已完全康復，儘管今次拍戲因憶起往事捱到生風癩，都能堅持下去，所以請大家放心：「我係個演員，我要說服自己必需搵返當時嘅感受，所以由舞台劇開始已經有情緒起伏，要不斷回憶返以前媽媽、屋企好多畫面，返返去以前我仲係有抑鬱症嗰個時期。抑鬱症好多時會影響皮膚，身體皮膚會一撻撻紅晒，會痛會痕，好似生風癩。今次都有，一係隻手，一係條頸，通常發作都係嗰個位，但無論如何，佢唔會攞我命嘅，我已經習慣咗。大家唔使擔心，身體嘅生理反應唔會影響到我情緒，我係完全處理到。始終有自己嘅信仰，如果唔係好返，我唔會夠膽做呢部戲。我係零工作壓力㗎依家，依然好開心，已經開始緊其他劇本，同埋做緊《生前約死後》後期。」
對於新戲的期望，馬浚偉除了明言渴望新戲能入圍明年金像獎，獲多項提名，更指希望透過新戲撫慰曾面對至親死亡的朋友，幫到大家正視情緒病，感受到親情的重要，互相扶持帶來的溫暖：「做《生前約死後》呢個電影係好辛苦，其實舞台劇開始我已經係編導演監，去到電影版都係，但電影嘅困難係我現場又要導，又要埋位拍。得一個人係困難，我唔可能變多個馬浚偉出嚟，雖然我有一個導演組，但始終佢哋唔係我。好多同事都知道我做足晒功課，用本簿仔寫低晒每一個機位、每一個燈光、每一個構圖，我自己到底想要乜嘢。冇辦法，既然決定咗要做就一定要承擔嗰個壓力，但對我嚟講呢一切壓力其實都係開心嘅，因為對我嚟講依個係太有意義嘅一個劇本，所以我唔會覺得辛苦。我更加多謝所有演員同埋工作人員，特別係攝影師、燈光師、所有道具、化妝、服裝、髮型，佢哋個個都好支持我喺現場所有指揮，完全配合我，我衷心多謝佢哋。我自己做過幾套舞台劇，到第一次做埋電影導演，總算幸不辱命。
我會將抑鬱症同驚恐症拍出嚟，將過去好難受嘅經驗變成畫面，等大家明白到抑鬱嘅人睇到嘅嘢會係點，或者驚恐症發作嘅時候其實係點，希望大家正視情緒病，如思覺失調等等，最重要係思念母親，同母親嘅情懷。大家要記住親情、生命、健康嘅寶貴，要活在當下，珍惜眼前。唔係每一個人都可以好幸福去照顧自己嘅家人，所以如果親人在世，唔好吝嗇一個擁抱、一句問候。兄弟姊妹又好，父母又好，公公婆婆爺爺嫲嫲，或者自己仔女，親情係好難得。」
▼現時馬浚偉即使工作很忙碌，都有積極幫助弱勢社群，如幫劏房戶免費入樂園玩、跟精神病患者照顧老人家、送糖水給露宿者、同紅皮症患者做朋友、與更生人士做義工、帶跨性別人士照顧流浪貓狗、幫驚恐症患者執屋、與智障人士玩耍，最感人是出錢出力幫患癌歌手李明蔚實現出碟夢