現年39歲的張栢芝自從2012年同謝霆鋒離婚之後，一直做單親媽咪照顧兩個仔Lucas同Quintus。栢芝曾經遭人冷言冷語，初初外界無人睇好佢會做個稱職媽咪，不過佢唔理閒言閒語，有仔萬事足，做好自己本份，漸漸地大家開始覺得佢係好媽媽，而佢亦不時上節目同觀眾分享湊仔心得。但近日張栢芝上內地綜藝節目《天天向上》時，唔少人睇完佢同主持人嘅對答之後，都批評佢係大話精，或根本唔係好媽咪，到底發生咩事？
（囝囝非常可愛）
張栢芝喺節目稱因為爸爸係廚師，佢自小受到爸爸嘅影響，非常鍾意煮餸，每天都會煮兩道唔同嘅餸畀Lucas同Quintus食。但當主持人問到兩個仔分別鍾意食咩餸嘅時候，張栢芝唔知係聽唔清普通話定點，幾次答非所問，無啦啦答：「三兒子喜歡奶」，又話大仔鍾意食中餐，二仔鍾意食西餐，聽到一班主持一頭霧水。喺多次追問之下，張栢芝到最後都沒答出菜名，只係重複講：「Lucas喜歡白米飯，Quintus喜歡漢堡包。」，令場面一度尷尬。後來張栢芝更稱自己只食蔬菜，天生只食素，一世人無食過肉類，令在埸人士異常震驚。其中一位主持人問道：「小時候爸媽餵你吃肉，其實你吃了也不知道吧？」而張栢芝則搖頭表示：「小時候我媽媽打我迫我，我也不吃肉的，因為我天生喜歡蔬菜，不過海鮮就可以吃。」
（主持人多次追問栢芝，想知佢會煮咩畀兩個仔食）
(張栢芝只係重複講：「Lucas喜歡白米飯，Quintus喜歡漢堡包。」)
(張栢芝更稱自己天生只食素)
節目播岀後，張栢芝呢段對答片段於網上引起熱烈討論，被大批網民質疑佢講大話，例如佢話自己從不食肉，但隨即被人翻出以前喺另一節目食肉嘅影片。而張栢芝自稱日日煮餸畀兩個仔食，但又答唔岀佢哋分別鍾意食咩，令佢身為媽媽的形象亦遭受質疑，更有網民直言：「真係好媽咪定大話精？」、「所以佢根本唔識煮餸」。
(部分網友意見)
當然亦有唔少人幫張栢芝講説話，覺得一時之間答唔岀菜名好正常，加上栢芝不時喺社交網上傳自己買餸嘅動態，大家或者唔應該質疑佢。你哋點睇呢？
(栢芝不時會上傳煮飯影片到IG)