夾到夾不到，全是靠彩數，大熱夾公仔機登陸香港，開到成行成市，掀起全新一輪夾公仔熱潮。市民每玩一次隨時要花數十元，這門生意是不是很賺錢，以及有一筆可觀的利潤？有不少公司看準投資新手覺得這塊是肥肉，想到一條台主制的絕橋，將場內的夾公仔機分租給市民做台主，讓他們自己營運夾公仔機。不過苦主申訴疑被夾公仔專門店詐騙，應邀加盟投資後卻遲遲未獲開業安排，賺錢大計淪為投資陷阱。《東張西望》日前聯絡加盟店負責人對質，另外主持李旻芳回應本報時就分享投資、做生意的心得。
(TVB電視截圖)
(TVB電視截圖)
港人瘋狂投資夾公仔機 騙徒似三合會威脅苦主
近期在社交平台，有公司招攬台主，揚言可以輕輕鬆鬆帶來可觀利潤，叫大家不要錯過機會，還舉辦講座教有興趣的市民如何創業。可是有2位台主陳小姐、張小姐就表示懷疑自己被騙：「嗰間公司介紹佢哋嚟緊開舖就會有夾公仔機出租畀大家，係一個投資嘅形式，每個月至少會有1萬蚊唔錯嘅回報。」，聽完之後她們就用6800港元的租金租一部夾公仔機3個月，以為等著收錢，怎料等了一段時間還不知道進展，於是就聯絡公司，想問舖頭究竟在哪裡經營。負責人就話舖頭仍然在裝修，還在洽商，但苦主就話知道有其他苦主之前租用九龍城的舖頭，當致電租務部時卻揭發根本沒有出租舖位給這間公司。苦主再就事件質問負責人，負責人卻指已經將舖位轉到藍田，但還是未有確實開業日期。最後苦主深感受騙，不斷WhatsApp、打電話給負責人想追討他們付出的金額，然而負責人竟然寸爆話：「喺講座嘅時候你哋應該諗清楚先畀錢，所以唔會退款。」
(TVB電視截圖)
(TVB電視截圖)
《東張西望》馬上聯同其中一位苦主陳小姐致電負責人質問九龍城舖頭是否已經承租，有沒有確實開店日子，惟夾公仔機男負責人（總經理）表示是因為租務問題，一來他本人不太清楚，二來其實租間舖不是投資者所想，付費租舖，簽個合約就完成。他又解釋自己好多工作要做，中間牽涉好多其他問題，所以不會回答到她究竟是已租，還是未租。曾先生仲帶陳小姐遊花園：「但未租係咪真係完全冇租呢，又唔係嘅，中間有好多缺口...」
陳小姐於是同對方要求若未能確實到日子就想申請退款，怎料他愈講愈寸咀，用威逼口吻嚇陳小姐：「我哋喺3月20號嘅講座，有客人到依家都未開店。你開始擔心係冇問題，你咪報警囉！你覺公司係欺騙、詐騙，報警啦，如果啊陳小姐你要將個關係搞得好差，其實最終蝕底嗰個係邊位呢？6月到未吖？6月都未到，我哋6月左右會開，30台機，就算你隔離嗰台賺好多錢唔係代表你賺錢，而係睇吓我哋畀咩大家。（但你之前又話每個月大概有1萬蚊？）係呀，你玩寸咗個Party，好簡單㗎咋，啲景品係我哋提供畀你，係咪？我畀啲好嘅景品隔離，就係唔畀好景品你，你點吖？你可以喺街搵㗎，但都要經過我哋審查。咁我想問吓你，到時3個月你咪喺度捱囉。6月左右開業嘅時候，你行到落去個個都望住你，我哋個個同事都話：『就係呢個陳小姐』，你諗吓到時你又會點啦拿？」
(TVB電視截圖)
不過《東張西望》隨即到有關商場視察，租務部回覆就話沒同有關公司簽約。
(TVB電視截圖)
網民激論21萬賺80蚊是蠢定醒？ 主持李旻芳分享投資心得
除了實體店，網絡夾公仔機都好流行，玩家透過手機應用程式遙距操控夾公仔機，成功夾到之後可以選擇郵寄方式收取禮品，但做網絡夾公仔機台主損失仲傷！苦主梁先生總共花了21萬6千港元投資2部夾公仔機，但前後半年只賺了80港元。節目播出後網民意見不一，有人覺得苦主投資21萬港元才賺得80港元完全是被騙，笑言香港好多傻仔，證明呃人是最賺錢的生意：「『呢期我都搵夠啦，真係好想比人賺吓』，如果真係咁好賺，使鬼益你哋街外人。騙徒手法層出不窮，咁多傻仔落搭，證明香港最賺錢嘅工係咩？呃人囉！」、「機又未見，舖又未見，就咁就租，原來香港真係好多傻仔」、「呃人仲咁惡，黑社會咁，不過都要有班傻仔貪心，先造就到呢班騙徒。」；但亦有人認為苦主明明話賺了80港元，這80港元應該是純利，那麼他豈不是有超過210080港元營業額，除開一個月足足有3萬多港元營業額，半年極速回本？如果繼續做，之後用不足2、3年不就能成為百萬富翁嗎？就這樣算，苦主反而是最聰明的投資者。
(TVB電視截圖)
(TVB電視截圖)
惟主持李旻芳回應本報查詢時表示苦主所說的「賺80港元」是「只得80港元」才對，實情他確實蝕了21萬。另外李旻芳表明自己不會投資夾公仔機：「第1我個人好保守，對於理財方面，我唔會攞咁大筆錢去做啲高風險嘅投資。同埋其2都見到好多呢啲片段，尤其我哋做《東張西望》見識過太多咁樣被人呃喇。《警訊》又有講，我哋《東張西望》又有講，其實好多媒體都有提到叫大家小心啲，但都始終有人會誤信騙徒，被佢哋呃錢。所以我覺得要警戒市民，叫佢哋唔好咁易信人，唔好貪小便宜，相信呢啲事情只係冰山一角，應該仲有好多各式各樣嘅騙案喺身邊發生緊，要帶眼識人之餘，唔好諗住用少少錢就博吓高收入投資.......我諗冇咁大隻蛤乸隨街跳。」，她還表示會寧願用一筆錢實實在在做生意，開餐廳、賣衫、賣首飾，都好過做偏門的生意。