當新樓頻頻推出，個個趕上樓的時候，有人卻要默默受苦。雖然近幾日氣溫都達到攝氏32度，有部分地方更加一度錄得接近35度高溫，不過很多長者卻要屈住在悶熱非常的劏房裡面。近日小編見到《東張西望》到大角咀一劏房單位訪問，直擊住客洪伯伯住在幾十呎窄小閣樓的惡劣環境，了解低下階層的苦況。洪伯話：「自己梗係想搬，但能力唔容許，我都想住高樓大廈幾千呎，就係想之嘛！」，連立法會議員張超雄探訪時都話想喊，表示無法想像這是一個家。
(TVB電視截圖)
伯伯屈住天花床位似棺材 曾難以呼吸又受過傷
今年73歲住在大角咀舊唐樓一個閣樓的洪伯伯，住處環境殘破，石屎剝落、鋼筋外露，連劏房都不如。原來業主不僅將500呎單位一劏5，高峰時期有3個單位住了2個人，有個單位住了一家4口，加起來有11個人。如今業主更加在公用的廚房、廁所天花板開了一個床位，變成2米乘4米的「閣樓」，說得難聽其實猶如棺材。上面的小門裡，原來是出租的床位，每次洪伯伯會靠放在廚房的竹造樓梯上落，但樓梯試過折斷3次，有一次搞到手受傷。
(張超雄facebook)
(張超雄facebook)
(TVB電視截圖)
(TVB電視截圖)
一上到天花床位就見到天花與牆身霉霉爛爛，污污糟糟，很多木蚤。由於空間太細，裡面只容納到幾件衣物、被鋪、風扇、儲物箱和垃圾桶，用家徒四壁來形容就最切合。洪伯伯在床位上亦只可屈身坐著或者躺著，伸展手腳都不夠空間，坐著隨時撞頭，多數會直接睡覺。大熱天時床位太悶熱，有哮喘的洪伯伯只能落樓梯到廚房，在窗前除去上衣，用風扇感受一點涼意。由於下面是廚房，床位沒有窗，令洪伯伯的境況雪上加霜：「有時瞓瞓吓忽然間呼吸好唔順暢，因為下面煮緊嘢食，唔舒服，自己頂唔順就落嚟。」住在隔離的杜太都覺得洪伯伯很可憐：「嗰度又多油煙，又焗又熱，佢年紀又咁大，仲質喺呢度住，心覺得唔舒服咁。」洪伯伯生活艱難，因此都避免跟親戚朋友有太多來往。冇人冇物，陪伴他的人生只有收音機，洪伯伯話平時最大的樂趣就是聽收音機。
(TVB電視截圖)
(TVB電視截圖)
(TVB電視截圖)
(TVB電視截圖)
屈住22年連基本生活都成問題
洪伯伯話由回歸前1997年已搬到這裡，住了20多年，以前上班，如今就沒有工作，拿綜援，隨時面對迫遷危機。別以為床位佔地細會很便宜，原來水費、電費、租金加起來一共都要2000港元，以他每月領取3200港元綜援金來算，減去2000港元，剩下的錢根本不夠生活。洪伯伯都很無奈：「梗係唔好啦，如果有錢淨，都唔會喺呢啲地方生活，啱唔啱？政府最好有間公屋畀我，但申請都要幾年，咁申請嚟做咩？幾時又未輪到你！」不過轉個頭，洪伯伯又接受現實，話住在這裡，比其他地方已經好好多：「你話搵一個床位都2000幾元，我呢度好過住床位，起碼我可以擺多少嘢都得。雖然窄窄哋，但嗰啲床位要爬上爬落，唔係你一個人住晒，呢度我就一個人住晒。」小編覺得雖然政府有扶貧措施，但往往被批評太離地，如果單純只是派生果金，不能從根本幫助弱勢社群脫離困境，最好就是定期落區才能體察民生問題。
(TVB電視截圖)
(TVB電視截圖)